اسلام آباد (نیوز ڈیسک)پاکستانی اداکارہ مومنہ اقبال کی شادی سے متعلق گردش کرنے والی خبروں کی آخرکار تصدیق ہوگئی ہے، جبکہ ان کے نکاح کی تاریخ بھی سامنے آ گئی ہے۔
میڈیا رپورٹس کے مطابق اداکارہ کی بہن رمشا اقبال نے بتایا ہے کہ مومنہ اقبال یکم جون کو محمد حمزہ حبیبی کے ساتھ رشتۂ ازدواج میں منسلک ہوں گی۔ ان کے مطابق یہ رشتہ خاندان کی رضامندی سے طے پایا ہے اور ہونے والے دولہا خاندان کے قریبی رشتے دار نہیں ہیں۔
یاد رہے کہ مومنہ اقبال ان دنوں ایک تنازع کے باعث بھی خبروں میں ہیں۔ اداکارہ نے حال ہی میں سوشل میڈیا پر انکشاف کیا تھا کہ ایک بااثر سیاسی شخصیت کی جانب سے انہیں اور ان کے اہلخانہ کو دھمکیاں دی جا رہی ہیں۔ اس حوالے سے انہوں نے انسٹاگرام پر ایک اسٹوری بھی شیئر کی تھی، جس کے بعد متعلقہ اداروں نے کارروائی شروع کردی۔
مومنہ اقبال کے قانونی معاملات ان کی بہن رمشا اقبال دیکھ رہی ہیں، جو پیشے کے اعتبار سے وکیل ہیں۔ میڈیا سے گفتگو کرتے ہوئے رمشا اقبال نے بتایا کہ کیس میں اب تک پیش رفت مثبت رہی ہے اور تمام ضروری شواہد تحقیقاتی حکام کو فراہم کر دیے گئے ہیں۔ ان کے مطابق متعلقہ ایم پی اے کو بھی طلب کیا جا چکا ہے۔
رمشا اقبال نے کہا کہ وہ اس معاملے کو غیر ضروری طور پر میڈیا میں اچھالنا نہیں چاہتے، تاہم انہیں مختلف مشکلات کا سامنا رہا۔ ان کا کہنا تھا کہ حکومت کی جانب سے نہ صرف مومنہ اقبال بلکہ ان کے سسرال والوں کو بھی سکیورٹی فراہم کی گئی ہے کیونکہ انہیں بھی دھمکیوں کا سامنا ہے۔
انہوں نے مزید کہا کہ وہ اپنی بہن کے کیس کی بھرپور قانونی پیروی کریں گی۔ رمشا اقبال کے مطابق انہوں نے بیرونِ ملک سے قانون کی تعلیم حاصل کی ہے اور پاکستان میں بھی وکالت کا عملی تجربہ رکھتی ہیں۔
