لاہور (این این آئی)یوٹیوبر ڈکی بھائی نے طلاق دینے والے مردوں پر تنقید کرتے ہوئے کہا ہے کہ شادی بچوں کا کھیل نہیں ہے۔
عدالت کے باہر میڈیا سے گفتگو کرتے ہوئے ڈکی بھائی نے ان مردوں کو سخت تنقید کا نشانہ بنایا جو شادی کے کچھ عرصے بعد ہی اپنی بیویوں کو طلاق دے دیتے ہیں۔انہوں نے کہا کہ اگر آپ ذہنی طور پر میچور نہیں ہیں تو شادی مت کریں، جب رشتہ نبھانا ہی نہیں تو کسی کی زندگی خراب کیوں کرتے ہیں؟۔ولاگر نے کہا کہ بعض لوگ شروع دن سے ہی جانتے ہیں کہ وہ یہ رشتہ نہیں چلائیں گے، لیکن پھر بھی شادی کر لیتے ہیں، جس سے دونوں خاندان متاثر ہوتے ہیں۔ڈکی بھائی کے مطابق رشتوں میں مسائل کو سمجھداری سے حل کرنا چاہیے اور ہر معاملے میں خاندان والوں کو شامل نہیں کرنا چاہیے کیونکہ اس سے معاملات مزید خراب ہو جاتے ہیں۔انہوں نے مشہور ڈرامہ نگار خلیل الرحمن قمر کے ایک بیان کا حوالہ دیتے ہوئے کہا کہ جو شخص رشتہ چھوڑنے کا فیصلہ کر لیتا ہے، وہ جذباتی طور پر پہلے ہی اس رشتے سے نکل چکا ہوتا ہے۔
سوشل میڈیا پر ڈکی بھائی کے اس بیان کو خوب سراہا جا رہا ہے، مداحوں کا کہنا ہے کہ ان کی باتوں سے ان کی اچھی تربیت اور خاندانی اقدار واضح نظر آتی ہیں، کئی صارفین نے انہیں سمجھدار اور ذمے دار شوہر قرار دیا۔
