ممبئی (نیوز ڈیسک) بالی ووڈ کی معروف اداکارہ اور سیاستدان کنگنا رناوت نے راہول گاندھی سے متعلق اپنی مبینہ شادی کی خبروں کو بے بنیاد قرار دیتے ہوئے سختی سے مسترد کر دیا ہے۔
حالیہ دنوں سوشل میڈیا پر مختلف سیاسی شخصیات کے بارے میں قیاس آرائیاں اور طنزیہ مواد گردش کر رہا تھا۔ اسی دوران ایک میم پیج کی جانب سے کنگنا رناوت کے نام سے منسوب ایک جعلی بیان شیئر کیا گیا، جس میں دعویٰ کیا گیا تھا کہ اگر راہول گاندھی بھارتیہ جنتا پارٹی میں شامل ہو جائیں تو وہ ان سے شادی کر سکتی ہیں۔ یہ پوسٹ تیزی سے وائرل ہو گئی اور بعض حلقوں میں اسے سچ سمجھ لیا گیا۔
اس صورتحال پر ردعمل دیتے ہوئے کنگنا رناوت نے اپنی انسٹاگرام اسٹوری کے ذریعے اس خبر کی تردید کی اور متعلقہ پوسٹ کا اسکرین شاٹ شیئر کیا۔انہوں نے واضح کیا کہ یہ خبر مکمل طور پر من گھڑت ہے اور اس کا حقیقت سے کوئی تعلق نہیں۔ اداکارہ نے اس بات پر افسوس کا اظہار بھی کیا کہ سیاست میں خواتین کو اکثر عزت اور سنجیدگی کے ساتھ نہیں لیا جاتا۔
مزید برآں، انہوں نے جھوٹی خبریں پھیلانے والوں کو تنقید کا نشانہ بناتے ہوئے کہا کہ ایسی بے بنیاد افواہیں پھیلانا قابلِ مذمت عمل ہے۔
