اسلام آباد (نیوز ڈیسک) پاکستانی اداکارہ اور مارننگ شو میزبان فضا علی اپنے پروگرام کے ایک متنازعہ لمحے کے بعد قانونی کارروائی کی زد میں آ گئی ہیں۔
میڈیا رپورٹس کے مطابق ایک وکیل محمد نواز ڈاہری نے پیمرا کے چیئرمین کو درخواست جمع کرواتے ہوئے مؤقف اختیار کیا ہے کہ نجی ٹی وی چینل کے مارننگ شو میں میزبان اور مہمان کی جانب سے غیر مناسب حرکات کی گئیں، جو ضابطہ اخلاق کی خلاف ورزی ہے۔ درخواست میں کہا گیا ہے کہ فضا علی نے اپنے شوہر کے ساتھ براہ راست پروگرام کے دوران ایسا عمل کیا جو ناظرین کے لیے نامناسب تھا، اور اس پر متعلقہ چینل اور پروگرام ٹیم کے خلاف کارروائی کی جانی چاہیے۔ وکیل کا کہنا ہے کہ اس واقعے کی ویڈیو سوشل میڈیا پر وائرل ہو چکی ہے، جس سے عوامی سطح پر تشویش پیدا ہوئی ہے۔
انہوں نے پیمرا سے مطالبہ کیا کہ اس معاملے کی فوری تحقیقات کی جائیں اور ذمہ داروں کے خلاف قانونی کارروائی عمل میں لائی جائے، جبکہ پروگرام کو بھی عارضی طور پر بند کرنے کی سفارش کی گئی ہے۔ یاد رہے کہ حال ہی میں فضا علی نے اپنے شو میں اپنے شوہر کو مدعو کیا تھا، جہاں گفتگو کے دوران انہوں نے ان سے کہا کہ وہ انہیں اسی طرح اٹھا کر دکھائیں جیسے گھر پر کرتے ہیں۔ اس پر ان کے شوہر نے لائیو پروگرام میں انہیں بازوؤں میں اٹھا لیا، جس کی ویڈیو بعد ازاں سوشل میڈیا پر وائرل ہو گئی اور مختلف ردعمل سامنے آئے۔
