اسلام آباد (نیوز ڈ یسک)اسلام آباد ہائیکورٹ نے منی لانڈرنگ کیس میں نامزد ڈاکٹر فضیلہ عباسی کی عبوری ضمانت بحال کرتے ہوئے انہیں ایک لاکھ روپے کے مچلکے جمع کرانے کی ہدایت جاری کر دی ہے۔
تفصیلات کے مطابق اربوں روپے کے اس کیس کی سماعت کے دوران ڈاکٹر فضیلہ عباسی اپنے وکیل نعیم بخاری کے ہمراہ عدالت میں پیش ہوئیں۔ ان کے وکیل نے مؤقف اختیار کیا کہ ان کی مؤکلہ اس سے قبل تین مرتبہ ٹرائل کورٹ میں پیش ہو چکی ہیں، تاہم ایک موقع پر بیماری کے باعث حاضری نہ دے سکیں اور تین روزہ میڈیکل سرٹیفکیٹ بھی جمع کرایا، لیکن عدالت نے اسے تسلیم کیے بغیر ضمانت منسوخ کر دی۔عدالت نے دلائل سننے کے بعد عبوری ضمانت بحال کرتے ہوئے ہدایت کی کہ وہ متعلقہ ٹرائل کورٹ سے دوبارہ رجوع کریں۔ ساتھ ہی رجسٹرار آفس کو کیس کو جلد سماعت کے لیے مقرر کرنے کا حکم بھی دیا گیا۔عدالت نے یہ بھی قرار دیا کہ ملزمہ کو دیے گئے مچلکوں کے عوض گرفتاری سے تحفظ حاصل ہوگا۔
واضح رہے کہ وفاقی تحقیقاتی ادارہ کو اس ہائی پروفائل منی لانڈرنگ کیس میں ڈاکٹر فضیلہ عباسی کی تلاش ہے، جن پر بیرونِ ملک بڑی رقوم منتقل کرنے کے الزامات ہیں۔ ٹرائل کورٹ سے ضمانت منسوخی کے بعد انہوں نے گرفتاری سے بچنے کے لیے ہائیکورٹ سے رجوع کیا تھا، جہاں سے انہیں عارضی ریلیف مل گیا ہے۔
