اسلام آباد (نیوز ڈیسک) اداکار حمزہ علی عباسی کی بہن ڈاکٹر فضیلہ عباسی کے مالی معاملات سے متعلق نئی تحقیقات میں بڑے انکشافات سامنے آئے ہیں،

جن میں بیرونِ ملک بھاری رقوم کی منتقلی کا معاملہ شامل ہے۔ذرائع کے مطابق وفاقی تحقیقاتی ادارہ نے منی لانڈرنگ کیس کی تفتیش کے دوران اہم ریکارڈ اور دستاویزات حاصل کی ہیں۔ ان شواہد میں بتایا گیا ہے کہ ڈاکٹر فضیلہ عباسی نے اپنی والدہ نسیم چوہدری اور بھائی کے ساتھ مشترکہ بینک اکاؤنٹس کے ذریعے لاکھوں ڈالرز اور درہم بیرونِ ملک منتقل کیے۔تحقیقی دستاویزات کے مطابق ان جوائنٹ اکاؤنٹس کے ذریعے 13 لاکھ ڈالرز سے زائد کی رقم ملک سے باہر بھیجی گئی، جبکہ فیڈرل بورڈ آف ریونیو کو اس کی بروقت اطلاع نہیں دی گئی۔مزید انکشاف ہوا ہے کہ ڈاکٹر فضیلہ عباسی نے اپنے ٹیکس گوشواروں میں صرف تین بینک اکاؤنٹس ظاہر کیے، جن میں بھی بے ضابطگیاں پائی گئیں۔

انہوں نے تقریباً 2 لاکھ ڈالرز کی جو رسیدیں پیش کیں، وہ ان کے ڈرائیور اور چند قریبی افراد کے نام پر تھیں، جنہیں تحقیقاتی ادارے نے ناقابلِ قبول قرار دے دیا۔تحقیقات کے دوران بعض کاروباری اداروں کے نام بھی سامنے آئے، تاہم ٹیکس ریکارڈ سے یہ ثابت نہ ہو سکا کہ ان کمپنیوں کا ان کی ظاہر کردہ آمدن سے کوئی واضح تعلق ہے۔ایف آئی اے حکام کے مطابق ملزمہ بڑی رقوم کے ذرائع اور منتقلی سے متعلق قابلِ اعتماد ثبوت فراہم کرنے میں ناکام رہی ہیں۔ ٹیکس گوشواروں میں ان رقوم کو شامل نہ کرنے کے باعث ان کا مؤقف مسترد کرتے ہوئے قانونی کارروائی کو مزید تیز کر دیا گیا ہے۔