اسلام آباد (نیوز ڈیسک) خیبر پختونخوا کے ضلع مانسہرہ کے علاقے بالاکوٹ میں مقامی ٹک ٹاکر جاوید،
جو سوشل میڈیا پر مہانڈری کے نام سے معروف تھے، کو مبینہ طور پر فائرنگ کرکے قتل کر دیا گیا۔ یہ افسوسناک واقعہ افطار سے کچھ دیر پہلے پیش آیا۔اطلاعات کے مطابق جاوید مہانڈری اپنے چند دوستوں کے ساتھ دریا کے کنارے افطار کرنے گئے تھے۔ اسی دوران ایک دوست کی آمد پر انہوں نے مذاق میں کوئی بات کہی، جس پر وہاں موجود افراد ہنسی مذاق میں مصروف تھے۔ سوشل میڈیا پر گردش کرنے والی ویڈیو میں بھی ابتدا میں ماحول خوشگوار دکھائی دیتا ہے، تاہم چند لمحوں بعد ایک شخص نے اچانک پستول نکال کر فائر کر دیا۔گولی لگنے سے جاوید مہانڈری موقع پر ہی زمین پر گر گئے۔ انہیں فوری طور پر اسپتال منتقل کیا گیا مگر وہ زخموں کی تاب نہ لاتے ہوئے دم توڑ گئے۔ بتایا جا رہا ہے کہ فائرنگ کرنے والا شخص مبینہ طور پر پولیس کا حاضر سروس اہلکار ہے جو واقعے کے بعد موقع سے فرار ہو گیا۔ابتدائی معلومات کے مطابق ملزم کو گمان تھا کہ اسلحہ خالی ہے، لیکن پستول کے چیمبر میں موجود گولی جاوید مہانڈری کے لیے جان لیوا ثابت ہوئی۔ واقعے کی خبر پھیلتے ہی مقتول کے لواحقین اور مقامی افراد شدید غم و غصے میں آ گئے۔
احتجاج کے دوران مظاہرین نے کاغان شاہراہ کو بند کر دیا اور ملزمان کی فوری گرفتاری کا مطالبہ کیا۔ بعد ازاں انتظامیہ سے مذاکرات ناکام ہونے پر مشتعل افراد نے بالاکوٹ پولیس اسٹیشن میں توڑ پھوڑ کی اور عمارت کو آگ لگا دی۔
جاوید مہانڈری بالاکوٹ کے رہائشی تھے اور اپنے خوش مزاج اور مزاحیہ انداز کی وجہ سے علاقے میں کافی مقبول تھے۔ وہ اپنی دلچسپ گفتگو اور حرکات سے بچوں، نوجوانوں اور بزرگوں کو محظوظ کرتے تھے۔ ان کی مزاحیہ ویڈیوز سوشل میڈیا پلیٹ فارم ٹک ٹاک پر ان کے ساتھی اپ لوڈ کرتے تھے جو ہزارہ ڈویژن میں خاصی مقبولیت رکھتی تھیں۔
بالاکوٹ پولیس اسٹیشن کے ایس ایچ او سید اسرار شاہ کے مطابق سوشل میڈیا پر وائرل ہونے والی ویڈیو کی مدد سے ملزم کی شناخت کر لی گئی ہے۔ ان کا کہنا ہے کہ واقعے کی مکمل تحقیقات جاری ہیں اور ملزم کو قانون کے مطابق سزا دلانے کے لیے کارروائی کی جا رہی ہے۔
ادھر خیبر پختونخوا اسمبلی کے اسپیکر بابر سلیم سواتی نے بھی اس واقعے پر افسوس کا اظہار کرتے ہوئے کہا کہ جاوید مہانڈری ایک ملنسار اور مقبول شخصیت تھے اور ان کی اچانک موت انتہائی افسوسناک ہے۔
جاوید مہانڈری قتل ویڈیو۔۔۔۔
بالاکوٹ میں سوشل میڈیا سٹار جاوید مہانڈری کے قتل کی ویڈیو سامنے آ گئی۔ویڈیو میں شاہد نامی پولیس اہلکار کو جاوید مہانڈری کو گولی مارتے دیکھا جا سکتا ہے۔۔۔۔۔۔ pic.twitter.com/2HN6lr9miE
— Farzana Ali (@farzanaalispark) March 3, 2026
