حیدرآباد(این این آئی)بھارتی ریاست تلنگانہ کے شہر حیدر آباد میں 21 سالہ یوٹیوبر اور سائنس کی طالبہ بونو کوملی نے اپنے کرائے کے فلیٹ میں خود کشی کر لی۔

بھارتی میڈیا کے مطابق پولیس کا کہنا تھا کہ واقعے سے کچھ دیر قبل بونو کوملی نے کویت میں مقیم اپنی والدہ کو پیغام بھیجا تھا جس میں اس نے اپنی والدہ سے محبت کا اظہار کیا تھا۔بونو کوملی نے لکھا تھا کہ ممی! میں آپ سے بہت محبت کرتی ہوں، یوٹیوبر نے اپنی والدہ سے چھوٹے بھائی کا خیال رکھنے کی درخواست بھی کی تھی۔پولیس کا کہنا تھا کہ متوفیہ ایک سافٹ ویئر انجینئر اور یوٹیوبر کے ساتھ 3 سالہ تعلق میں تھی تاہم حال ہی میں دونوں کی علیحدگی ہو گئی تھی، متوفیہ نے 6 ماہ قبل بھی خودکشی کی کوشش کی تھی۔

لاش کو پوسٹ مارٹم کے لیے اسپتال منتقل کر دیا گیا ہے۔پولیس نے مشتبہ موت کا مقدمہ درج کر کے فون ریکارڈنگز، پیغامات اور قریبی افراد کے بیانات کی بنیاد پر تحقیقات شروع کر دی ہیں۔