اسلام آباد (نیوز ڈ یسک) سال 2023 میں مقبول ہونے والے انگریزی گانے “ٹو مچ” سے شہرت حاصل کرنے والے برطانوی ریپر اور گلوکار سینٹرل سی کے اسلام قبول کرنے کی خبر سامنے آئی ہے۔
نجی ٹی وی چینل کے مطابق سینٹرل سی نے ایک لائیو اسٹریمنگ سیشن کے دوران اس بات کی تصدیق کی کہ انہوں نے اسلام قبول کر لیا ہے اور ساتھ ہی اپنا نام بھی تبدیل کر لیا ہے۔ لائیو گفتگو میں انہوں نے بتایا کہ وہ کلمہ شہادت پڑھ چکے ہیں اور اب خود کو مسلمان سمجھتے ہیں۔27 سالہ فنکار نے مزید انکشاف کیا کہ قبولِ اسلام کے بعد انہوں نے اپنا پہلا نام اوکلی بدل کر عقیل رکھ لیا ہے۔ اس موقع پر لائیو اسٹریم میں موجود ان کے دوستوں نے انہیں مبارکباد دی، تاہم انہوں نے اپنے روحانی سفر کی تفصیلات شیئر نہیں کیں۔ اس سے قبل سینٹرل سی نے کبھی کھل کر اپنے مذہبی خیالات پر بات نہیں کی تھی، البتہ سوشل میڈیا پر ان کی بعض پوسٹس میں عربی کیپشنز دیکھ کر مداحوں کی جانب سے مختلف قیاس آرائیاں کی جاتی رہی تھیں۔4 جون 1998 کو لندن میں پیدا ہونے والے سینٹرل سی نے 2014 میں موسیقی کے میدان میں قدم رکھا۔
وقت کے ساتھ وہ برطانوی ڈرل اور ریپ میوزک کے نمایاں فنکاروں میں شمار ہونے لگے۔ مغربی لندن سے تعلق رکھنے والے اس گلوکار نے مختلف موسیقی اندازوں کو یکجا کر کے عالمی سطح پر اپنی شناخت بنائی۔سینٹرل سی اپنی منفرد دھنوں اور عام زندگی سے جڑے بولوں کی بدولت دنیا بھر میں لاکھوں مداحوں میں مقبول ہیں۔ واضح رہے کہ فنّی دنیا میں سینٹرل سی کے نام سے پہچانے جانے والے اس برطانوی گلوکار کا اصل نام اوکلی نیل سیزر سو ہے۔
View this post on Instagram
