اسلا م آباد(نیوز ڈ یسک ) بھارت میں بننے والی نئی ایکشن فلم ’’دھُرندھر‘‘ کو خلیجی خطے میں ریلیز کی منظوری نہیں مل سکی۔بالی ووڈ ہنگامہ کی رپورٹ کے مطابق بحرین، کویت، عمان، قطر، سعودی عرب اور متحدہ عرب امارات—تمام ممالک نے فلم کی نمائش سے انکار کر دیا ہے۔ذرائع کا کہنا ہے کہ ان ریاستوں کو خدشہ تھا کہ فلم کا مواد پاکستان مخالف تصور ہوسکتا ہے، اسی لیے سینسر بورڈز نے اسے کلیئرنس دینے سے گریز کیا۔

پہلے بھی اس نوعیت کی کئی بھارتی فلمیں خلیج میں نمائش کی اجازت حاصل نہیں کرسکیں، اور ’’دھُرندھر‘‘ کی ٹیم کی کوششوں کے باوجود فیصلہ تبدیل نہ ہوا۔رپورٹس کے مطابق فلم میں رنویر سنگھ کے ساتھ اکشے کھنہ، سنجے دت، آر مادھون، ارجن رامپال، سارا ارجن اور رکیش بیڈی بھی شامل ہیں، جبکہ ہدایت کاری ادتیہ ڈَٹ نے انجام دی ہے۔ کہانی ایک ایسے بھارتی افسر کے گرد گھومتی ہے جو پاکستان میں داخل ہو کر وہاں کے سیاسی اور جرائم پیشہ نیٹ ورک کو چیلنج کرتا ہے۔یہ صورتحال نئی نہیں۔ اس سے قبل 2024 میں رتیک روشن اور دپیکا پڈوکون کی فلم ’’فائٹر‘‘ کو بھی ابتدا میں تمام خلیجی ممالک نے ریلیز سے روک دیا تھا۔ اگرچہ ابتدا میں صرف یو اے ای نے اسے نمائش کی اجازت دی، مگر پلوامہ حملے کی منظرکشی پر پاکستان مخالف بیانیے کی شکایات کے بعد اگلے ہی دن فلم کی اسکریننگ وہاں بھی روک دی گئی تھی۔