اسلام آباد (نیوز ڈیسک)اگر آپ بالی وڈ موسیقی کے مداح ہیں تو ممکن نہیں کہ ارجیت سنگھ کا نام نہ سنا ہو۔ ان کی جادوئی آواز اور جذبات سے بھرپور گیت انہیں دنیا بھر کے سننے والوں کے دلوں میں ایک منفرد مقام دلاتے ہیں۔تاہم، حال ہی میں ایک انٹرویو میں بھارتی موسیقار مونٹی شرما، جو کہ لیجنڈری کمپوزر پیارے لال شرما کے بھتیجے ہیں، نے ارجیت سنگھ کے حوالے سے حیران کن انکشاف کیا ہے۔ ان کے مطابق، ارجیت سنگھ ایک لائیو کنسرٹ کے لیے تقریباً 2 کروڑ بھارتی روپے معاوضے کے طور پر وصول کرتے ہیں۔

مونٹی شرما نے بتایا کہ ایک وقت تھا جب ارجیت سنگھ کئی کئی گھنٹے ان کے ساتھ بیٹھ کر سیکھا کرتے تھے، لیکن اب ان کی شہرت اور مارکیٹ ویلیو اتنی بڑھ چکی ہے کہ ان کی پرفارمنس دیکھنے کے لیے لوگ کروڑوں روپے ادا کرنے کو تیار ہیں۔انہوں نے مزید کہا کہ زمانہ بدل گیا ہے، پہلے لوگ ریڈیو اور ٹی وی پر گانے سنتے تھے، لیکن اب یوٹیوب اور او ٹی ٹی پلیٹ فارمز نے موسیقی کی دنیا میں انقلاب برپا کر دیا ہے۔ ان کے مطابق اگر وہ خود بھی ایک گانا ریکارڈ کرواتے ہیں جس پر 15 سے 20 لاکھ لاگت آتی ہے، تو اس کے تقریباً 90 فیصد حقوق آڈیو کمپنی اپنے پاس رکھ لیتی ہے۔اس انکشاف سے اندازہ لگایا جا سکتا ہے کہ موجودہ دور میں موسیقی نہ صرف جذبات کا اظہار ہے بلکہ ایک بہت بڑی انڈسٹری بھی بن چکی ہے، جہاں کامیابی کا معیار صرف فن نہیں بلکہ مارکیٹ ڈیمانڈ بھی ہے۔