اسلام آباد (نیوز ڈیسک) پاکستان کرکٹ ٹیم کے سابق آل راؤنڈر عماد وسیم اور ان کی اہلیہ ثانیہ اشفاق کے درمیان ممکنہ علیحدگی سے متعلق چہ مگوئیاں اس وقت شدت اختیار کر گئیں جب ثانیہ نے سوشل میڈیا پر ایک مبہم پیغام شیئر کیا۔ انسٹاگرام پر اپنی پوسٹ میں انہوں نے لکھا:”خاموشی کو نہ تو رضا مندی سمجھا جائے اور نہ ہی ثبوت کی عدم موجودگی، میں صرف مناسب وقت کے انتظار میں ہوں۔”یہ پیغام ایسے وقت میں سامنے آیا ہے جب عماد وسیم کا سوشل میڈیا پر اثرانداز شخصیت نائلہ راجہ کے ساتھ تعلقات کی افواہیں زیرِ گردش ہیں، جن کی نائلہ خود سختی سے تردید کر چکی ہیں۔
حال ہی میں ثانیہ اشفاق نے انسٹاگرام پر اپنے بیٹے زیان کی پیدائش کے بعد ایک جذباتی پوسٹ شیئر کی، جس میں عماد وسیم کا کوئی ذکر شامل نہیں تھا۔ انہوں نے لکھا:”میں نے تمہیں نو ماہ تک اپنے وجود میں اکیلے اٹھایا، اللہ مجھے آئندہ کے سفر کے لیے مزید ہمت دے۔”سوشل میڈیا صارفین نے ان پوسٹس میں عماد کا ذکر نہ ہونے کو دونوں کے درمیان کشیدگی کی علامت قرار دیا ہے۔ مزید برآں، صارفین نے مشاہدہ کیا کہ ثانیہ نے انسٹاگرام پر اپنی پروفائل سے عماد کے ساتھ تمام تصاویر ہٹا دی ہیں اور بایو کو بھی تبدیل کر کے اب صرف “عنایہ اور ریان کی ماں” لکھا ہے۔ پہلے یہ بایو “عماد وسیم کی بیوی” پر مشتمل تھا۔
دوسری طرف، عماد وسیم کے انسٹاگرام اکاؤنٹ پر ثانیہ کے ساتھ تصاویر بدستور موجود ہیں اور دونوں ایک دوسرے کو فالو بھی کر رہے ہیں۔ اس معاملے پر عماد وسیم نے تاحال کوئی سرکاری بیان نہیں دیا۔ادھر نائلہ راجہ، جنہیں ایک وائرل ویڈیو کے بعد تنازع میں گھسیٹا گیا، نے اپنے بیان میں کہا کہ ویڈیو کو سیاق و سباق سے ہٹ کر پیش کیا گیا ہے۔ انہوں نے سوشل میڈیا پر ہونے والی کردار کشی کی مذمت کرتے ہوئے کہا:”میں بھی ایک عورت ہوں، اپنی زندگی عزت، محنت اور ضبط نفس کے ساتھ گزاری ہے، بلاجواز اندازوں سے گریز کریں۔”انہوں نے مزید کہا کہ معاشرے میں خواتین کے کردار پر بے جا تنقید اور دوہرا معیار اب ختم ہونا چاہیے۔
