اسلام آباد (نیوز ڈیسک)سوشل میڈیا پر ان دنوں پاکستان کے سابق کپتان شاہد آفریدی اور بالی ووڈ اداکار اجے دیوگن کی ایک تصویر تیزی سے وائرل ہو رہی ہے، جس میں دونوں شخصیات خوشگوار موڈ میں ایک دوسرے سے ملتے اور بات چیت کرتے دکھائی دے رہے ہیں۔تصویر میں اجے دیوگن کو شاہد آفریدی سے پرتپاک انداز میں مصافحہ کرتے ہوئے دیکھا جا سکتا ہے، جس کے بعد یہ تصاویر سوشل پلیٹ فارمز پر زیر بحث آ گئیں۔

تاہم بھارتی شدت پسندوں نے اس منظر پر برہمی کا اظہار کرتے ہوئے اجے دیوگن کو سخت تنقید کا نشانہ بنایا ہے۔یہ تصاویر ایک ایسے وقت سامنے آئی ہیں جب حال ہی میں لندن میں ہونے والی لیجنڈز ورلڈ چیمپئنز شپ کے دوران بھارت اور پاکستان کے درمیان شیڈول میچ سیکیورٹی اور سیاسی کشیدگی کے باعث منسوخ کر دیا گیا۔ ایسے میں یہ تصویر بھارتی صارفین کے درمیان جذباتی ردعمل کا باعث بنی۔تاہم حقیقت اس کے برعکس ہے۔ وائرل ہونے والی یہ تصاویر حالیہ واقعہ سے نہیں بلکہ گزشتہ برس یعنی 2024 میں برمنگھم میں منعقد ہونے والے لیجنڈز ورلڈ چیمپئن شپ کے دوران لی گئیں تھیں، جب شاہد آفریدی اور اجے دیوگن کی ملاقات ایک خوشگوار موقع پر ہوئی تھی۔بھارتی سوشل میڈیا پر بعض عناصر نے اس پرانی تصویر کو حالیہ بتا کر عوامی جذبات کو ابھارنے کی کوشش کی، تاہم کچھ ذمہ دار بھارتی صارفین نے اس پروپیگنڈے کا پردہ چاک کرتے ہوئے تصویر کی اصل تاریخ اور پس منظر واضح کر دیا ہے۔