کراچی (این این آئی)سوشل میڈیا اسٹار، ماڈل اور اداکار فیروز خان کی سابقہ اہلیہ سیدہ علیزہ سلطان نے خواتین کو شریکِ حیات کے انتخاب کے حوالے سے مشورہ دیتے ہوئے انہیں خبردار کیا ہے کہ وہ بڑا فیصلہ لینے سے قبل 100 سال تک سوچیں۔انسٹاگرام اسٹوری میں علیزہ سلطان نے خواتین کو خبردار کیا کہ وہ زندگی کے اہم فیصلے میں جلد بازی سے کام نہ لیں بلکہ وقت لے کر سوچ سمجھ کر فیصلہ کریں تاکہ بعد میں پچھتاوا نہ ہو۔انہوں نے لکھا کہ صحیح شریکِ حیات کا انتخاب بہت ضروری ہے، اپنی زندگی کا یہ بڑا فیصلہ کرنے سے پہلے مکمل غور و فکر کریں، کیونکہ ایک غلط فیصلہ پوری زندگی پر اثر ڈال سکتا ہے۔علیزہ سلطان کے مطابق اگر سوچے سمجھے بغیر کسی غلط شخص سے شادی کی جائے تو زندگی کا ہر دن آپ کے لیے مشکل ہوگا اور آپ ہر لمحے خود کو قصور وار سمجھیں گی۔

انہوں نے پوسٹ میں اپنی ناکام شادی سے متعلق کچھ نہیں لکھا، تاہم ان کی پوسٹ کو متعدد شوبز سوشل میڈیا پیجز کی جانب سے شیئر کیا گیا، جہاں صارفین نے ملے جلے رد عمل کا اظہار کیا۔علیزہ سلطان کے بیان کو سوشل میڈیا پر خاصی توجہ ملی اور کئی صارفین ان کے تجربے کی روشنی میں دیے گئے اس مشورے کو قابلِ قدر بھی قرار دیا۔علیزہ سلطان اور فیروز خان میں 2022 میں طلاق ہوگئی تھی، دونوں کو دو بچے ایک بیٹا، ایک بیٹی ہیں، جن کی پرورش دونوں مشترکہ طور پر کر رہے ہیں۔دونوں نے 2018 میں شادی کی تھی، اداکار نے طلاق کے دو سال بعد 2024 میں دوسری شادی کرلی تھی، تاہم عیلزہ سلطان نے تاحال دوسری شادی نہیں کی۔علیزہ سلطان نے فیروز خان پر گھریلو تشدد کے الزامات بھی عائد کیے تھے جب کہ دونوں کے درمیان بچوں کی حوالگی اور کفالت کا کیس بھی طویل عرصے تک زیر سماعت رہا اور ان کے کیسز تاحال عدالتوں میں زیر سماعت ہیں۔