اسلام آباد (این این آئی)چاہت فتح علی خان نے کہا ہے کہ عدنان صدیقی کو سالگرہ کی مبارک باد دینے کیلئے 92 ہزارسے زائد رقم وصول کی تھی،کئی پاکستانی فنکار اپنے ڈراموں یا دیگر پروموشنز کیلئے مجھ سے ذاتی ویڈیوز ،اشتہارات بنواتے ہیں، میں سب کیلئے دستیاب ہوں۔ایک ویڈیو میں چاہت فتح علی خان نے بتایا ہے کہ معروف اداکار عدنان صدیقی کو سالگرہ کی مبارکباد دینے کے بدلے 250پونڈز (تقریبا 92 ہزار 500 پاکستانی روپے)وصول کیے تھے۔

اس انکشاف کے بعد سوشل میڈیا پر ملا جلا ردعمل دیکھنے میں آیا، کچھ صارفین نے چاہت کو مبارک باد دی جبکہ کئی افراد نے ان کا مذاق اڑایا۔ ایک صارف نے طنزیہ انداز میں کہا کتنے پیسے لو گے کہ انٹرنیٹ سے غائب ہو جائو؟جواب دیتے ہوئے چاہت فتح علی خان نے اپنی فیس کا دفاع کیا اور کہا ہے کہ اب میں صرف سالگرہ کی مبارک باد کیلئے 100پائوونڈز چارج کرتا ہوں، یہی میری آمدنی کا ذریعہ ہے، میں جب کسی شو میں جاتا ہوں یا کسی فیملی ایونٹ کا حصہ بنتا ہوں، تب بھی معاوضہ لیتا ہوں۔انہوں نے وضاحت کی کہ میری سالگرہ کی مبارکباد کوئی معمولی ویڈیو نہیں ہوتی، میں 1 سے 5منٹ کی ویڈیو تیار کرتا ہوں، جس میں تعریفیں اور کبھی کبھار گانا بھی شامل ہوتا ہے۔

چاہت فتح علی خان نے انکشاف کیا کہ کئی پاکستانی فنکار بھی اپنے ڈراموں یا دیگر پروموشنز کے لیے مجھ سے ذاتی ویڈیوز اور اشتہارات بنواتے ہیں، میں سب کے لیے دستیاب ہوں، اللہ سب کو خوش رکھے۔انہوں نے یہ بھی کہا کہ اب یہ کام میری مکمل پیشہ ورانہ مصروفیت بن چکا ہے، یہی میرا کام ہے آپ کو تفریح فراہم کرنا، آپ کے کاروبار کو پروموٹ کرنا، آپ کے یوٹیوب چینل کی تشہیر کرنا اور ٹک ٹاکرز کی مدد کرنا۔