اسلام آباد (نیوز ڈیسک) — بالی ووڈ کے معروف اداکار شاہ رخ خان نے تقریباً دو دہائیوں کے بعد پہلی بار اپنی رہائش گاہ ’منت‘ کو عارضی طور پر چھوڑ دیا ہے، جس کے بعد وہ میڈیا کی توجہ کا مرکز بنے ہوئے ہیں۔
بھارتی ذرائع ابلاغ کے مطابق شاہ رخ خان اور ان کا خاندان ممبئی کے ایک مہنگے علاقے میں واقع ’پوجا کاسا‘ اپارٹمنٹس میں منتقل ہو گیا ہے۔ ان کی مستقل رہائش، باندرہ میں واقع مشہور بنگلہ ’منت‘، اس وقت تزئین و آرائش کے مراحل سے گزر رہا ہے، جس کی وجہ سے وہ کچھ وقت کے لیے وہاں سے منتقل ہو گئے ہیں۔
اس خبر کے منظر عام پر آنے کے بعد، سوشل میڈیا پر ایک ویڈیو وائرل ہوئی ہے جس میں معروف صحافی سدھارتھ کنن، نجومی گیتانجلی سکسینہ کا انٹرویو کر رہے ہیں۔ اس ویڈیو میں سدھارتھ نے ان افواہوں کا تذکرہ کیا جن میں کہا جا رہا ہے کہ شاہ رخ خان دیوالیہ ہو چکے ہیں۔
ٹیرو کارڈ ریڈر گیتانجلی سکسینہ نے اداکار کی تاریخِ پیدائش اور ان کے ستاروں کی روشنی میں تجزیہ کرتے ہوئے کہا کہ شاہ رخ خان کو کام سے شدید لگاؤ ہے، لیکن ان کے مالی حالات اس وقت پریشان کن دکھائی دیتے ہیں۔ انہوں نے دعویٰ کیا کہ شاہ رخ ممکنہ طور پر قرضوں کا سامنا کر رہے ہیں اور ان کے مالی مسائل بڑھتے جا رہے ہیں۔
گیتانجلی کا مزید کہنا تھا کہ شاہ رخ خان ان مشکلات سے نکلنے کی بھرپور کوشش کر رہے ہیں اور وہ قانونی معاملات میں بھی الجھے ہوئے ہیں۔ ان کے مطابق یہ وقت اداکار کے لیے تبدیلی کا ہے، اور انہیں نئی سمت اختیار کرنی چاہیے۔
فلمی مستقبل کے حوالے سے گفتگو کرتے ہوئے نجومی نے کہا کہ شاہ رخ خان کی آنے والی فلمیں اس وقت بہتر کامیابی حاصل کریں گی جب وہ اگست 2025 کے بعد ریلیز ہوں گی۔
