لندن (این این آئی)انفلوئنسر و بزنس ویمن کائلی جینر ،شاہ رخ خان اور رونالڈو سے بھی زیادہ سالانہ آمدن کمانے والی شخصیت بن گئیں۔فوربز میگزین کے مطابق کائلی جینر دنیا کی سب سے زیادہ کمانے والی مشہور شخصیت ہیں۔ ریئلٹی ٹی وی سٹار اور فیشن انٹرپرینیور کائلی نے 2020ء میں 590ملین ڈالرز کمائے جو کسی بھی مشہور شخصیت کی سالانہ کمائی کا نیا ریکارڈ ہے۔

کائلی کی آمدنی کا بڑا حصہ ان کے میک اپ برانڈ کائلی کاسمیٹکس سے آتا ہے جسے انہوں نے 2015ء میں شروع کیا تھا۔ جنوری 2020ء میں انہوں نے اپنے برانڈ کے 51فیصد حصص 600ملین ڈالرز میں عوامی طور پر تجارت کرنیوالی کمپنی کو فروخت کر دیئے تھے، تاہم 27سالہ کائلی جینر اب بھی کمپنی میں 44فیصد حصص کی مالک ہیں جو انہیں قابل ذکر آمدنی فراہم کرتے ہیں۔فوربز کے مطابق کائلی جینر کی کل دولت 700ملین ڈالرز سے زائد ہے۔

امریکی انفلوئنسر حال ہی میں ایک تنازعے کا شکار ہوئیں تھیں جب انہیں دنیا کی سب سے کم عمر ترین سیلف میڈ ارب پتی قرار دیا گیا تھا،تاہم فوربز نے بعد میں یہ نوٹ کیا کہ کائلی اور کارڈیشین جینر کے خاندان کی جانب سے کاروبار کے حجم کو کئی سال تک غلط طور پر پیش کیا گیا۔یہی وجہ تھی کہ بعد میں کائلی سے ارب پتی خاتون کا خطاب واپس لے لیا گیا تاہم وہ اب بھی دنیا کی سب سے امیر ترین شوبز شخصیات میں سے ایک ہیں اور ٹاپ 100امیر نوجوان افراد میں بھی شامل ہیں جن کے دنیا بھر میں کروڑوں کی تعداد میں فالوورز ہیں۔