کراچی (این این آئی)گلوکار بلال سعید نے لائیو کنسرٹ کے دوران مداحوں کو مائیک دے مارا جس کی ویڈیو سوشل میڈیا پر وائرل ہورہی ہے۔میڈیا رپورٹ کے مطابق سوشل میڈیا پر اداکار بلال سعید کے میوزک کنسرٹ کی ویڈیو وائرل ہورہی ہے جس میں انہیں اسٹیج پر پرفارم کرتے ہوئے دیکھا جاسکتا ہے۔ویڈیو میں سنا جاسکتا ہے کہ بلال سعید اپنا پرانا گانا کو کو تو میری جانا گا رہے ہوتے ہیں کہ اچانک وہ غصے سے بھڑک اٹھتے ہیں اور اپنے ہاتھ میں موجود مائیک کنسرٹ کے حاضرین کی جانب دے مارتے ہیں۔

بلال سعید حاضرین کی جانب مائیک پھینکنے کے بعد کچھ بھی کہے بغیر غصے سے سٹیج چھوڑ کر چلے جاتے ہیں، گلوکار کو سٹیج سے جاتا دیکھ کر حاضرین میں موجود ایک مداح کہتا ہے کہ پروگرام تو وڑ گیا۔گلوکار کی یہ ویڈیو تیزی سے سوشل میڈیا پر وائرل ہورہی ہے کچھ صارفین کا کہنا ہے کہ یہ کنسرٹ پنجاب یونیورسٹی میں ہوا تھا لیکن اس بات کی تصدیق نہیں ہوسکی۔دوسری جانب ابھی تک بلال سعید کے اچانک غصے کی وجہ بھی سامنے نہیں آسکی جبکہ ویڈیو پر صارفین کی جانب سے تبصروں کا سلسلہ جاری ہے۔