کراچی (این این آئی)اداکارہ سجل علی کو صدر عارف علوی 23مارچ 2024 کو یوم پاکستان کے موقع پر تمغہ امتیاز سے نوازیں گے۔بدھ کو جاری سرکاری بیان میں کہا گیا کہ سول ایوارڈ اداکارہ کی اداکاری کے شعبے میں ایک دہائی سے زائد عرصے تک کی شاندار خدمات کا ثبوت ہے۔ سجل علی نے سری دیوی اور نوازالدین صدیقی کیساتھ حال ہی میں ریلیز ہونیوالی جمائما گولڈ سمتھ کی پروڈکشن اور شیکھر کپور کی ہدایتکاری میں بننے والی ہالی ووڈ فلم واٹس لو گوٹ ٹو ڈو ود اٹ میں شبانہ اعظمی، لیلیٰ جیمز، ایما تھامسن کے ساتھ بھی سکرین پر بہترین اداکاری کے جوہر دکھائے۔سجل علی کو زبردست ،دلوں کو چھو لینے والی اداکارانہ صلاحیتوں کی وجہ سے نا صرف پاکستان بلکہ بین الاقومی سطح پر بھی بہت پذیرائی ملی ہے۔ انہوں نے ٹی وی ڈراموں اور فلموں دونوں میں ہی شاندار کارکردگی کا مظاہرہ کیا۔اداکارہ نے 14سال پر محیط کیریئر میں ننھی، رنگ ریزہ، یقین کا سفر، آنگن، الف، سناٹا، گناہ آہن، یہ دل میرا، چپ رہو، گلِ رانا، محبت جائے بھاڑ میں، نورالعین، اور کچھ ان کہی جیسے ڈراموں میں اپنی بہترین اداکاری سے دنیا بھر کے ناظرین سے داد وصول کی۔ سجل علی 2009 میں شوبز انڈسٹری میں قدم رکھنے کے بعد اب تک تقریبا 40سے زائد ڈراموں، 14ٹیلی فلموں، اور 4فلموں میں شاندار کارکردگی کی وجہ سے ابھر کر سامنے آئی ہیں اور شوبز کی دنیا میں ایک اپنا ایک منفرد مقام رکھتی ہیں۔