نیویارک (مانیٹرنگ ڈیسک /این این آئی)ڈیجیٹل کرپٹو کرنسی بٹ کوائن کی قیمت میں ایک بار پھر ہوشربا اضافہ ہو گیا ، گزشتہ روز ایک بٹ کوائن کی قیمت 74لاکھ سے تجاوز کر گئی ۔ بٹ کوائن کی اس غیرمعمولی اڑان کا سبب خودکار گاڑیاں بنانے والی کمپنی ٹیسلا بنی ہے۔

واضح رہے کہ دنیا کے امیر ترین شخص ایلن مسک کی گاڑیاں بنانے والی امریکی کمپنی ٹیسلا نے اعلان کیا ہے کہ اس نے جنوری میں ڈیڑھ ارب ڈالر کی کرپٹوکرنسی بٹ کوائن خریدی ہے۔ٹیسلا کا کہنا ہے کہ وہ کاغذ کی کرنسی کے استعمال میں کمی کی کوشش کررہی ہے اورمستقبل میں وہ بٹ کوائن کو کرنسی کے طور پر قبول کرسکتی ہے۔ٹیسلا کے اس اعلان کے ساتھ ہی بٹ کوائن کی قیمت میں17فیصد اضافہ دیکھا گیا جس کے باعث اس کی قیمت 44 ہزار 220 ڈالر تک پہنچ گئی یعنی ایک بٹ کوائن کی قیمت پاکستانی روپے میں 68 لاکھ روپے سے زائد ہوگئی ہے۔خیال رہے کہ گذشتہ دنوں ہی ٹیسلا کے بانی اور سی ای او ایلن مسک نے اپنی ٹوئٹر پروفائل میں بٹ کوائن کے ہیش ٹیگ کا اضافہ کیا تھا تو تب بھی ڈیجیٹل کرنسی کی قدر میں نمایاں اضافہ دیکھا گیا تھا۔چند روز قبل ایک انٹرویو میں ایلن مسک نے امید ظاہر کی تھی کہ دنیا بھر میں جلد ہی بٹ کوائن کو کرنسی کے طور پر تسلیم کرلیا جائے گا اور سرمایہ کار تجارتی معاملات کے لیے کرپٹوکرنسی کو قبول کرلیں گے۔ماہرین کا کہنا ہے کہ دنیا کی بڑی کمپنیوں میں سے ایک ٹیسلا کی جانب سے بٹ کوائن میں سرمایہ کاری گیم چینجر ثابت ہوسکتی ہے۔