ممبئی (این این آئی)بھارت میں جاری کسانوں کے احتجاج پر ایک کے بعد ایک مشہور عالمی شخصیات اور بالی وڈ سمیت دیگر شعبوں سے جڑے افراد کا ردعمل سامنے آرہا ہے۔ اب اس فہرست میں بھارتی اداکارہ اور سپر ماڈل اروشی روتیلا کا بھی اضافہ ہوگیا ہے۔26سالہ اروشی روتیلا نے
کسانوں کے احتجاج کی حمایت کرتے ہوئے کہا ہے کہ کسان ہمارے ملک کی ریڑھ کی ہڈی ہیں اور اپنے حقوق کے لئے لڑ رہے ہیں۔اروشی روتیلا نے شملہ کے دورے کے دوران کہا کہ میں کسانوں کی حمایت کرتی ہوں کیونکہ وہ اپنے حقوق کے لئے لڑ رہے ہیں۔اس سے قبل رواں ماہ بالی وڈ کے سپراسٹار سلمان خان نے اس معاملے پر کہا تھا کہ صحیح اور سب سے درست چیز ہونی چاہیے۔واضح رہے کہ امریکی گلوکارہ ریحانہ کی جانب سے بھارتی کسانوں کے لئے کئے گئے ٹوئٹ کے بعد کئی بالی وڈ اداکاروں نے جوابی ٹوئٹس کیے اور اس معاملے کو سازش قرار دیا تھا۔بھارتی اداکاروں کی جانب سے ایک ساتھ ٹوئٹ سامنے آنے کے بعد خود بھارتی عوام نے سوشل میڈیا پر اپنی ہی حکومت اور اداکاروں پر شدید تنقید کرتے ہوئے کہا کہ حکومت سے پیسے لیکر یہ اداکار مہم چلانے کے لیے میدان میں آگئے اور انہیں اپنے اس روئیے پر شرم آنی چاہیے۔
