لاہور( این این آئی)تین باربہترین اداکارہ کا ایوارڈ حاصل کرنے والی ماضی کی معروف اداکارہ فردوس بیگم 80 برس کی عمرمیں انتقال کرگئیں ، انہیں برین ہیمبرج ہونے پرنجی ہسپتال داخل کرایا گیا تھا مگروہ جانبرنہ ہوسکیں اور اپنے خالق حقیقی سے جا ملیں،شوبزشخصیات نے

فردوس بیگم کے انتقال پر گہرے رنجم و غم کااظہار کرتے ہوئے کہا ہے کہ ان کے انتقال سے فن اداکاری کا ایک اور باب بند ہو گیا ۔ تفصیلات کے مطابق فردوس بیگم نے 60ء کی دہائی میں فلم ”فانوس ” سے اپنے فنی کیرئیر کا آغازکیا ،1965 میں ریلیزہونے والی فلم ”ملنگی ”کامیاب ہوئی اورفردوس سپراسٹاربن گئیں۔ ان کی فلم اسٹار اکمل کے ساتھ جوڑی ہٹ ہوئی تو دونوں نے شادی کرلی۔ اکمل نے گلبرگ کے علاقے میں مارکیٹ خرید کراس کا نام فردوس مارکیٹ رکھا جوآج بھی بہت مقبول ہے۔1970 میں فلم ”ہیر رانجھا ”نے فردوس کو سپراسٹار بنا دیا۔ ” ہیررانجھا ”میں فردوس کی اداکاری، ڈائیلاگ ڈلیوری اوررقص کو بہت سراہا گیا۔ فردوس کی جوڑی اکمل ، سدھیر، یوسف خان اوراعجاز درانی کے ساتھ مقبول رہی۔ فردوس کی فلمسازشیخ نذیرحسین سے دوسری شادی ہوئی ۔فردوس بیگم نے 1976 میں فلم انڈسٹری کو خیرباد کہا لیکن پھر 1984 میں دوبارہ سلوراسکرین پر جلوہ گر ہوئیں۔ فردوس نے اپنے فنی سفر

کے دوران 170 سے زائد اردو، پنجابی اورپشتو زبان کی فلموں میں کام کیا اور انہیں تین بار بہترین اداکارہ کا ایوارڈ بھی ملا۔ فردوس بیگم نے پسماندگان میں دوبیٹے اورایک بیٹی چھوڑے ہیں۔سینئر ہدایتکارہ و اداکارہ سنگیتا بیگم، بہار بیگم، نشو، قوی خان ،ریما ،ثنائ،مدیحہ شاہ، شاہدہ منی

، خوشبو، ندیم بیگ،غلام محی الدین، شاہد حمید، مصطفی قریشی، اچھی خان، سینئر ہدایتکار سید نور، شان،افضل خان، صاحبہ سمیت دیگر نے فردوس بیگم کے انتقال پر گہرے رنج و غم کااظہارکرتے ہوئے کہا ہے کہ فردوس بیگم نے اپنے لازوال فن کے ذریعے نام کمایا اور امر ہو گئیں۔ اللہ تعالیٰ سے دعا ہے کہ انہیں جنت الفردوس میں جگہ دے اور ان کے اہل خانہ کو صبر جمیل عطا کرے ۔