ممبئی (این این آئی)کوئین، شاندار اور چلر پارٹی‘ سمیت متعدد کامیاب فلموں کی ہدایات دینے والے ڈائریکٹر وکاس بہل کو خاتون کو ہراساں کرنے کے الزامات سے کلیئر قرار دے دیا گیا۔وکاس بہل پر اکتوبر 2018 میں ان کی فلم کمپنی ’فینٹم‘ کی ملازم خاتون نے ہراساں کرنے کا الزام عائد کیا تھا۔‘فینٹم’ کی خاتون ملازم نے ان پر الزام لگایا تھا کہ ہدایت کار نے انہیں 2015 میں اس وقت ہراساں کیا جب وہ فلم ‘بمبے ویلوٹ’ کی تشہیر میں مصروف تھے۔خاتون کے مطابق تشہیر کے دوران ہدایت کار نے انہیں متعدد بار نامناسب انداز میں چھوا تھا۔
اس خاتون کے سامنے آنے کے بعد اداکارہ کنگنا رناوٹ نے بھی وکاس بہل پر نامناسب انداز میں ملنے اور نازیبا گفتگو کرنے کے الزامات لگائے تھے۔کنگنا رناوٹ نے دعویٰ کیا تھا کہ وکاس بہل نے انہیں 20014 میں ریلیز ہونے والی فلم ‘کوئین’ کی شوٹنگ کے دوران ہراساں کیا۔کنگنا رناوٹ کے مطابق وہ وکاس بہل سے گلے ملا کرتی تھیں اور ڈائریکٹر انہیں کافی دیر تک بانہوں کے زور سے دبا کر رکھتے تھے، یہاں تک کہ وہ اپنا چہرہ ان کی گردن کے انتہائی قریب لاکر اداکارہ کے بالوں کی خوشبو سونگھا کرتے تھے۔