ممبئی(این این آئی)با لی وڈ کے اداکار سلمان خان خلاف ڈی این نگر پولیس اسٹیشن میں مقدمہ درج کرلیا گیا۔غیرملکی میڈیا رپورٹس کے مطابق ایک شخص کی جانب سے سلمان خان کے خلاف موبائل چھیننے کا مقدمہ درج کروایا گیا ۔اس شخص کا کہنا ہے کہ دبنگ خان لنکنگ روڈ پر سائیکلنگ کررہے تھے تو وہ ان کی ویڈیو بنارہا تھا، اس دوران سلمان خان کو غصہ آیا اور انہوں نے میرا فون چھین لیا۔
رپورٹ میں بتایا گیا کہ اشوک شام لال پانڈے نامی ایک صحافی نے دعویٰ کیا کہ اس نے اپنے ساتھی کیمرامین کے ہمراہ سلمان خان کو سڑک پر دیکھا جس کے بعد اداکار کے محافظ سے اجازت طلب کی اور ان کی ویڈیو بنانا شروع کی تاہم جب سلمان خان نے دیکھا تو اچانک معاملہ بگڑ گیا۔پانڈے کے مطابق سلمان خان کے محافظوں نے ان سے بدسلوکی کی اور اداکار نے ان کا فون بھی چھین لیا جسے بعد میں واپس کردیا گیا۔تاہم ایک اور شخص کے مطابق سلمان خان سڑک پر سائیکلنگ کررہے تھے اسی دوران ان لوگوں نے سلمان کے برابر میں آ کر تصاویر اور ویڈیوز بنانا شروع کردیں جس پر دبنگ خان نے ایسا نہ کرنے کو کہااور پیچھے موجود ان کے محافظوں نے بھی ان سے درخواست کی کہ وہ ایسا نہ کریں مگر یہ دونوں باز نہ آئے، پھر وہ کار سے اتر گئے اور لگاتار سلمان خان کی تصاویر بناتے رہے، سلمان نے اس موقع پر ان سے فون لیا اور اپنے ساتھ لے کر چل دیئے تاہم تھوڑا آگے جاکر سلّو میاں نے وہ فون اپنے محافظ کے حوالے کیا جس نے اس شخص کو فون واپس کردیا۔واضح رہے سلمان خان ان دنوں اپنی نئی آنے والی فلم ‘بھارت’ کے پراجیکٹ پر کام کررہے ہیں جو رواں برس 5 جون کو ریلیز ہوگی۔
