لاہور(این این آئی)شوبز انڈسٹری سے تعلق رکھنے والے فنکار بھی لاہور میں شوہر کے ہاتھوں تشدد کا نشانہ بننے والی خاتون اسماء عزیز کے حق میں بول پڑے۔ اس حوالے سے امریکہ میں مقیم سینئر اداکارہ بندیا ،احسن خان ،شبنم مجید ،ببرک شاہ ،عینی طاہرہ ،نور ،میرا ،ماورا حسین،نیلم منیر،مہک نور اور پروڈیوسر آمنہ بٹ نے کہا کہ عورت ماں ، بہن اور بیٹی کے روپ میں ایک خوبصورت ترین رشتہ ہے۔ دین اسلام نے عورت کو بڑے عزت و احترام کا درجہ دیا گیا ہے ۔ انہوں نے کہا کہ اسماء عزیز نے پسند کی شادی کی۔
اور اس سے جو بھی غلطی ہوئی ہم اس بحث میں نہیں پڑتے ،ہر انسان اپنے اچھے اور برے عمل کا جواب دہ خود ہے مگر کسی پر ظلم ہوتا دیکھ کر مسلمان کا خاموش رہنا اسکا شیوہ نہیں ۔ انہوں نے کہاکہ اسماء کے ساتھ اسکے شوہر نے جس قدر ذلت آمیز سلوک کیا ہے اس پر اسے کڑی سے کڑی سزا ملنی چاہیے ۔جبکہ امریکہ میں مقیم اداکارہ بندیا نے کہا کہ ایسے افراد کو نشان عبرت بنانے کے لئے انہیں بھی سرعام سڑکوں پر رقص کروا کے انکے بال کاٹنے چاہیے تاکہ پھر کسی کو کسی پر ظلم کرنے کا تصور بھی نہ ہو ۔
