لاہور(این این آئی)پاکستان کی معروف اداکارہ و ماڈل ریچل خان نے کہا ہے کہ کسی بھی قوم کی ترقی میں خواتین کا کلیدی کردار ہوتا ہے ، جرمنی ، جاپان ، امریکہ ، چین سمیت دنیا کے تمام ترقی یافتہ ممالک میں خواتین زندگی کے ہر شعبہ زندگی میں نمایاں کارنامے انجام دے رہی ہیں۔
جبکہ اس کے مقابلے میں ہمارے ہاں خواتین کو وہ مقام اور درجہ نہیں مل رہا جس کی وہ حقدار ہیں۔ انہوں نے خصوصی گفتگو کرتے ہوئے کہا کہ پاکستان کی ترقی کے لئے خواتین کا کردار لازم و ملزوم ہے ۔دیہی علاقوں میں آج بھی جاگیر دارنہ سوچ کے لوگ خواتین کو اپنے پاؤں کی جوتی سمجھتے ہیں اس حوالے سے قانون موجود ہے مگر اس پر عملدرآمد نہیں ہوتا ۔ضرورت اس امر کی ہے کہ خواتین کے حقوق کے لئے ٹھوس بنیادوں پر اقدامات کیے جائیں ۔انہوں نے کہا کہ اس وقت صرف دو شعبوں میں خواتین نمایاں طور پر نظر آتی ہیں جن میں سیاست اور شوبز کی دنیا شامل ہے جبکہ اس کے علاوہ خواتین کسی اور شعبے میں کامیاب نظر نہیں آتیں ۔ہمیں پاکستان کی ترقی کے لئے خواتین کے کردار کو کسی بھی طور پر فرموش نہیں کرنا چاہیے۔ریچل خان نے کہا کہ میں نے شوبز کی دنیا میں بڑی مشکلات کا سامنا کیا اور ان مشکلات سے نکل کر میں کامیاب ہوئی اور میں نے اپنا کامیاب بزنس بھی کیا ، میری مثال سب کے سامنے ہے اور بھی بے شمار ایسی خواتین موجود ہیں ۔مگر جس طرح کے مواقع خواتین کو ملنے چاہیے وہ نہیں مل رہے ۔ انہوں نے کہا کہ یہ بات خوش آئند بات ہے کہ شہری علاقوں میں اب آکر کچھ خواتین کو اچھی پوسٹوں پر تعینات کیا جا رہا ہے لیکن پسماندہ اور دیہی علاقوں میں صورتحال اب بھی ابتر ہے اس حوالے سے ضرور اسمبلی میں خصوصی قانون پاس ہونا چاہیے تاکہ خواتین انکے جائز اور اصل حقوق مل سکیں۔
