لاہور(این این آئی) فلمسٹارریما نے کہا ہے کہ میں نے اپنی زندگی کا بہترین دور فلم انڈسٹری میں گزارا ہے ،اپنے وقت کے تمام ہیروز کے ساتھ کام کیا ہے ،ریمبو اوربابر علی کے ساتھ کام کرنے کا لطف آتا تھا ،اداکار شان کے ساتھ بھی کام کرنا اچھا تھا ۔انہوں نے ایک انٹرویو کے دوران کہا کہ میں نے شان کو کبھی فلموں سے نہیں ہٹایا وہ ایک وقت میں خود ہی بریک لیکر امریکہ چلے گئے تھے ان کے جانے کے بعد میں نے سعود اوربابر علی کے ساتھ اپنی جوڑی بنا لی تھی اور مجھے انکے ساتھ کام
کرنے کا سب سے زیادہ لطف آیا ۔انہوں نے کہا کہ باحیثیت پروڈیوسر و ڈائریکٹر اپنی فلم بنائی تو اس وقت احساس ہوا کہ ایک شوٹنگ کینسل ہوجانے سے فلمساز کو ایک دن کا کتنا نقصان برداشت کرنا پڑتا ہے ۔ انہوں نے کہاکہ میں اپنے بیٹے عدنان شہاب کی ایک اچھی ماں کی طرح بھرپور انداز میں پرورش کررہی ہوں اور میری خواہش ہے کہ وہ بڑا ہوکر ایک اچھا انسان بنے ۔ جو لوگ اپنے بچوں کو آیا کے حوالے کردیتے ہیں تو پھر وہی بچے اپنے والدین کو ایک وقت میں نرسوں کے حوالے کردیتے ہیں ۔
