ممبئی(شوبز ڈیسک)بولی وڈ اسٹار کڈ جھانوی کپور بھی اداکارہ عالیہ بھٹ کی طرح کرن جوہر کی ملکیت دھرما پروڈکشنز کی پسندیدہ اداکارہ بنتی جارہی ہیں۔جھانوی کپور کی بولی وڈ میں پہلی فلم ’دھڑک‘ کرن جوہر کی پروڈکشن میں بنائی گئی تھی۔جس کے بعد کرن جوہر نے انہیں اپنی ہدایات میں بننے والی فلم ’تخت‘ میں بھی کاسٹ کرلیا۔جہاں بولی وڈ میں سوانح حیات پر مبنی فلموں کا رواج تیزی سے بڑھ رہا ہے وہیں اب خبریں ہیں کہ جھانوی کپور بھی بہت جلد دھرما فلمز کی تیسری فلم میں بھی کام کرتی نظر آئیں گی، جس کی کہانی بھارتی ایئر فورس

پائلٹ گنجن سکسینا کی زندگی پر مبنی ہے۔یاد رہے کہ گنجن سکسینا ان خواتین ایئرفورس پائلٹس میں سے ایک ہیں جن کی پوسٹنگ سال 1999 کی جنگ کے دوران کاگل میں ہوئی تھی۔ذرائع کے مطابق جھانوی کپور نے اپنے کردار کے لیے گنجن سے ملاقات بھی کی اور اس کردار کے لیے تربیت لینا بھی شروع کردی۔اس فلم کی پروڈکشن کا کام اگلے سال سے شروع ہوگا، جبکہ ابھی ہدایت کار کی تلاش جاری ہے۔یاد رہے کہ جھانوی کی پہلی فلم ’دھڑک‘ باکس آفس پر شاندار بزنس کرنے میں کامیاب رہی۔اس فلم میں ان کی اداکاری کو خوب سراہا گیا، جھانوی کپور کو ان کے فیشن کے لیے بھی سراہا جاتا رہا ہے۔جھانوی کی دوسری فلم ’تخت‘ تاریخی کہانی پر مبنی ہوگی، جس کی ہدایات کرن جوہر دے رہے ہیں۔اس فلم میں رنویر سنگھ، کرینہ کپور خان، عالیہ بھٹ، بھومی پڈنیکر اور وکی کوشل بھی کام کرتے نظر آئیں گے۔