ممبئی (شوبز ڈیسک) فلم انڈسٹری میں نئی آنے والی لڑکیوں سے کیسے کیسے مطالبات کئے جاتے ہیں، اس کا ذکر دبے دبے الفاظ میں تو کیا جاتا تھا لیکن پہلی بار ایسا ہو رہا ہے کہ مشہور اداکارائیں اندر کی باتیں باہر لا رہی ہیں۔ اس سلسلے میں تازہ ترین اضافہ بالی وڈ کی مشہور ترین اداکارہ دیپکا پڈوکون ہیں۔
جنہوں نے واقعی ایک حیران کن بات بتا دی ہے۔ وہ کہتی ہیں کہ شروع کے دنوں میں انہیں کہا گیا کہ اگر وہ فلم انڈسٹری میں کامیابی چاہتی ہیں تو اپنے نسوانی حسن میں اضافہ کروائیں۔ اب ایسی بیہودہ بات کہنے والوں کا اصل مطلب کیا تھا، دیپکا نے اس کی مزید وضاحت نہیں کی۔برطانوی جریدے ’ایوننگ سٹینڈرڈ‘ کو دئیے گئے انٹرویو میں ان کا کہناتھا ’’مجھے بہت سی باتیں سمجھائی گئیں۔ نسوانی حسن میں اضافہ کرواؤ، یہ بھی کہا گیا۔ ان کا کہناتھا کہ پہچان بنانے اور کسی ڈائریکٹر یا پروڈیوسر کی نظر میں آنے کا یہی درست طریقہ ہے۔ تم جو حاصل کرنا چاہتی ہو اس کے حصول کا یہ آسان طریقہ ہے۔ لیکن میں اس طرح کی لڑکی نہیں ہوں۔ میں نے ہمیشہ اپنے من کی مانی ہے۔‘‘جب ان سے ’می ٹو‘ تحریک کے بارے میں سوال پوچھا گیا تو ان کا کہنا تھا ’’ہمار احال بھی وہی ہے جو باقی دنیا میں ہے۔ اب اس کے بارے میں کافی آگاہی آ رہی ہے۔ اب لوگ اس کے متعلق کھل کر بات کر رہے ہیں اور میں بھارت میں بھی کچھ ایسا ہی دیکھ رہی ہوں۔‘‘
