اسلام آباد (نیوز ڈیسک) اسلام آباد پولیس نے مختلف شعبوں میں خالی آسامیوں پر بڑے پیمانے پر بھرتیوں کا اعلان کردیا ہے۔ نئی بھرتیوں کے لیے مرد اور خواتین دونوں امیدوار اہل ہوں گے، جبکہ تعیناتی سب انسپکٹر، اسسٹنٹ سب انسپکٹر اور کانسٹیبل کے عہدوں پر کی جائے گی۔

بھرتی مہم کے تحت مجموعی طور پر 1624 خالی نشستیں پُر کی جائیں گی۔ تفصیلات کے مطابق سب انسپکٹر کی 60، اسسٹنٹ سب انسپکٹر کی 24 جبکہ کانسٹیبل کی 1540 آسامیوں پر امیدواروں کا انتخاب کیا جائے گا۔

درخواست کے لیے کون سی دستاویزات ضروری ہیں؟

بھرتی کے مراحل میں کامیاب ہونے والے امیدواروں کو انٹرویو کے موقع پر اپنی اصل اسناد اور مطلوبہ دستاویزات ساتھ لانا ہوں گی۔ امیدواروں کو درج ذیل کاغذات فراہم کرنا ہوں گے:

نادرا کا جاری کردہ اصل شناختی کارڈ
تعلیمی اسناد اور متعلقہ سرٹیفکیٹس
اصل ڈومیسائل سرٹیفکیٹ
نیلے پس منظر کے ساتھ پاسپورٹ سائز کی دو تصاویر
اقلیتی کوٹے پر درخواست دینے والے امیدواروں کے لیے متعلقہ ڈپٹی کمشنر سے تصدیق شدہ حلف نامہ

حکام نے امیدواروں کو مشورہ دیا ہے کہ درخواست جمع کرانے سے قبل تمام ضروری دستاویزات مکمل اور تیار رکھیں، تاکہ بھرتی کے آئندہ مراحل کے دوران کسی قسم کی رکاوٹ پیش نہ آئے۔

اسلام آباد پولیس میں اپلائی کرنے کا طریقہ

اسلام آباد پولیس کی مذکورہ آسامیوں کے لیے درخواستیں آن لائن جمع کرائی جائیں گی۔ خواہشمند امیدواروں کو درخواست دینے کے لیے نیشنل پولیس فاؤنڈیشن ٹیسٹنگ سروس (NPFTAS) کے آن لائن پورٹل کا استعمال کرنا ہوگا۔

آن لائن فارم بھرتے وقت امیدوار اپنی ذاتی معلومات، تعلیمی قابلیت اور دیگر مطلوبہ کوائف درست انداز میں درج کریں۔ درخواست جمع کرانے سے پہلے امیدواروں کے لیے ضروری ہے کہ وہ بھرتی کے اشتہار میں درج اہلیت، شرائط اور دیگر تقاضوں کا بغور جائزہ لے لیں۔

اسلام آباد پولیس کی یہ بھرتیاں سرکاری ملازمت کے خواہشمند نوجوانوں کے لیے ایک اہم موقع ہیں، اس لیے اہل امیدوار مقررہ طریقہ کار کے مطابق بروقت درخواست جمع کرائیں۔