اسلام آباد (نیوز ڈیسک)شہریوں کو شناختی کارڈ کے حصول اور تجدید میں سہولت فراہم کرنے کے لیے نیشنل ڈیٹا بیس اینڈ رجسٹریشن اتھارٹی (نادرا) نے اے ٹی ایم کی طرز پر جدید سیلف سروس کیوسکس متعارف کرادیے ہیں۔
نادرا کے اس نئے نظام کے بعد شہری متعدد شناختی خدمات کے لیے کاؤنٹر پر جانے یا طویل قطار میں انتظار کرنے کے بجائے خودکار مشینوں کے ذریعے اپنی درخواست کا عمل مکمل کرسکیں گے۔سیلف سروس کیوسکس سے شناختی کارڈ کی تجدید، نائیکوپ کی تجدید، گم یا خراب ہونے والے شناختی کارڈ کا دوبارہ اجرا، دستاویزات کی منسوخی اور فیملی رجسٹریشن سرٹیفکیٹ سمیت مختلف سہولیات حاصل کی جاسکیں گی۔شہری کیوسک کی ٹچ اسکرین پر مطلوبہ سروس منتخب کرنے کے بعد ہدایات کے مطابق مراحل مکمل کریں گے، جبکہ شناخت کی تصدیق کے لیے مشین پر فنگر پرنٹ کے ذریعے بائیومیٹرک تصدیق بھی کی جائے گی۔نادرا کے ترجمان سید شباہت علی کے مطابق اس خودکار نظام کے ذریعے تقریباً 65 سے 70 فیصد شہریوں کی درخواستیں کاؤنٹر پر جائے بغیر نمٹائی جاسکیں گی، جس سے رجسٹریشن مراکز میں رش اور انتظار کے وقت میں کمی متوقع ہے۔
دوسری جانب نادرا نے اسلام آباد، راولپنڈی، لاہور اور کراچی کی 18 منتخب ای سہولت فرنچائزز پر شناختی کارڈ کے ری پرنٹ کی سہولت کا پائلٹ منصوبہ بھی شروع کردیا ہے۔شہری پاک آئی ڈی (PakID) موبائل ایپ اور آن لائن پورٹل کے ذریعے بھی گھر بیٹھے شناختی دستاویزات سے متعلق اپنی درخواستیں جمع کراسکتے ہیں۔حکام کے مطابق ایسے معاملات جن میں اضافی دستاویزات یا پیچیدہ بائیومیٹرک تصدیق درکار ہوگی، ان کے لیے ملک بھر میں موجود 963 رجسٹریشن سینٹرز، 14 میگا سینٹرز اور 234 موبائل رجسٹریشن وینز بدستور دستیاب رہیں گی۔
