کراچی(این این آئی)نیشنل ڈیٹا بیس اینڈ رجسٹریشن اتھارٹی (نادرا)نے نائکوپ کی میعاد ختم ہونے، گم یا خراب ہونے پر دوبارہ بنوانے کا آسان طریقہ بتا دیا۔
نادرا کی جانب سے جاری بیان کے مطابق اگر آپ کے نائکوپ کی میعاد ختم ہوگئی ہے، یہ گم یا خراب ہوگیا ہے تو آپ پاکستان بھر میں کسی بھی نادرا دفتر سے نیا کارڈ بنوا سکتے ہیں، یہ پاک آئی ڈی ایپ کے ذریعے بھی دوبارہ بنوایا جا سکتا ہے۔نادراکے مطابق تجدید یا ری پرنٹ کیلیے کسی اضافی دستاویز کی ضرورت نہیں، صرف پرانا شناختی کارڈ نمبر ہی کافی ہے۔نادرا میگا سینٹرز پر سیلف سروس کائوسک کی سہولت موجود ہے جہاں سائل خود اپنا نمبر درج کر کے بائیومیٹرک تصدیق، تصویر اور دستخط اپ ڈیٹ کر کے درخواست جمع کروا سکتا ہے۔فیس کی ادائیگی کیلیے ای سہولت، ایزی پیسہ، جیز کیش اور راست جیسے ڈیجیٹل ذرائع استعمال کیے جا سکتے ہیں۔کیٹیگریز درخواست گزار اپنی ضرورت کے مطابق نارمل، ارجنٹ یا ایگزیکٹو کیٹگری کا انتخاب کر سکتے ہیں۔نادرا حکام کے مطابق یہی تمام عمل نادرا کی موبائل ایپلیکیشن کے ذریعے گھر بیٹھے بھی مکمل کیا جا سکتا ہے۔ پاک آئی ڈی کے ذریعے اپلائی کرنے کی صورت میں کارڈ دنیا بھر میں سائل کے فراہم کردہ پتے پر ڈیلیور کر دیا جائے گا۔انہوں نے کہا کہ نادرا کا مقصد شہریوں کو جدید ٹیکنالوجی کے ذریعے کم سے کم وقت میں بہترین خدمات فراہم کرنا ہے۔
