کراچی(این این آئی)عالمی سطح پر بڑھتی ہوئی سیاسی بے یقینی اور معاشی خدشات کے باعث سونے کی قیمت نے نئی تاریخ رقم کر دی ہے۔بدھ کوبین الاقوامی بلین مارکیٹ میں فی اونس سونے کی قیمت یکدم 127ڈالر کے بڑے اضافے سے 4ہزار 840ڈالر ہوگئی ، جو اب تک کی بلند ترین سطح ہے۔ملک میں بھی فی تولہ سونے کی قیمت 12ہزار 700روپے کے بڑے اضافے سے 5لاکھ 6ہزار 362روپے کی نئی بلند سطح پر آگئی۔اس کے علاوہ فی دس گرام سونے کی قیمت 10ہزار 888روپے بڑھ کر 4لاکھ 34ہزار 123روپے کی سطح پر آگئی۔

اسی طرح فی تولہ چاندی کی قیمت 64 روپے کے اضافے سے 9ہزار 933 روپے کی نئی بلند سطح پر آگئی، فی دس گرام چاندی کی قیمت 54روپے کے اضافے سے 8ہزار 515روپے کی سطح پر آگئی۔ ماہرین کے مطابق محفوظ سرمایہ کاری(سیف ہیون)کی بڑھتی ہوئی طلب اور امریکی ڈالر کی کمزوری نے سونے کی قیمتوں کو اوپر دھکیل دیا۔اسپاٹ گولڈ کی قیمت 1.2 فیصد اضافے کے ساتھ 4,821 ڈالر فی اونس تک پہنچ گئی، جبکہ کاروبار کے دوران یہ 4,843 ڈالر کی ریکارڈ سطح کو بھی چھو گئی۔اسی طرح فروری میں ڈیلیوری کے لیے امریکی گولڈ فیوچرز 1 فیصد اضافے کے بعد 4,813 ڈالر فی اونس پر ٹریڈ کرتے رہے۔ماہرین کے مطابق امریکی صدر ڈونلڈ ٹرمپ کی جانب سے یورپی ممالک پر ممکنہ ٹیرف، گرین لینڈ پر کنٹرول کے سخت بیانات اور نیٹو اتحادیوں پر تنقید نے سرمایہ کاروں کے اعتماد کو شدید دھچکا پہنچایا ہے۔

ٹرمپ نے حالیہ دنوں میں کہا تھا کہ گرین لینڈ کے معاملے پر واپسی کا کوئی راستہ نہیں اور طاقت کے استعمال کے امکان کو بھی رد نہیں کیا، جس سے عالمی منڈیوں میں بے چینی پھیل گئی۔بعد ازاں ٹرمپ نے لہجہ نرم کرتے ہوئے کہا کہ نیٹو کے ساتھ مل کر ایسا حل نکالا جائے گا جس سے تمام فریق خوش ہوں گے، تاہم یورپی رہنماں نے سخت ردعمل دیا۔ فرانسیسی صدر ایمانویل میکرون نے واضح کیا کہ یورپ دبا یا دھمکیوں کے آگے نہیں جھکے گا۔مارکیٹ تجزیہ کاروں کے مطابق سرمایہ کار امریکی ڈالر اور طویل مدتی بانڈز سے نکل کر سونے میں سرمایہ کاری کر رہے ہیں۔ ڈالر یورو اور سوئس فرانک کے مقابلے میں تین ہفتوں کی کم ترین سطح کے قریب رہا، جبکہ ایشیائی اسٹاک مارکیٹس میں مسلسل تیسرے روز بھی مندی دیکھی گئی۔