کراچی (این این آئی) پی آئی اے نے اپنے مسافروں کو بین الاقوامی سطح پر جدید اور مربوط سفری سہولیات فراہم کرنے کے لیے کینیڈا اور برطانیہ کی معروف ریل سروسز کے ساتھ “ایئر ٹو ریل” اشتراک کا آغاز کر دیا ہے۔ اس تاریخی معاہدے کے تحت پی آئی اے کے مسافر اب ایک ہی ٹکٹ پر ہوائی سفر کے ساتھ ساتھ ٹرین کے ذریعے اپنی منزل مقصود تک پہنچ سکیں گے۔ ترجمان پی آئی اے کے مطابق پی آئی اے کی پروازوں سے ٹورنٹو پہنچنے والے مسافر وہاں کی پارٹنر ریل سروس کے ذریعے کینیڈا کے 8 اہم شہروں تک سفر جاری رکھ سکیں گے۔

اسی طرح پاکستان سے پی آئی اے کی پروازوں سے لندن اور مانچسٹر کے لیے سفر کرنے والے مسافر برطانیہ بھر کے 50 سے زائد شہروں تک ٹرین کے ذریعے رسائی حاصل کر سکیں گے۔مسافروں کی سہولت کے لیے اس مشترکہ سفر کی بکنگ کے عمل کو انتہائی آسان بنا دیا گیا ہے۔ اب مسافر اپنی منزل کے لیے ٹکٹ پی آئی اے کے تمام بکنگ دفاتر، رجسٹرڈ ٹریول ایجنٹس ،پی آئی اے کی باضابطہ ویب سائٹ اور پی آئی اے کی موبائل ایپلیکیشن سے حاصل کر سکتے ہیں ترجمان نے مزید کہا کہ اس معاہدے کا مقصد مسافروں کو ان کے گھر کی دہلیز تک سفری سہولت فراہم کرنا ہے۔ اس سے نہ صرف وقت کی بچت ہوگی بلکہ مسافروں کو بیرون ملک پہنچ کر ٹرین کی بکنگ کے لیے الگ سے تگ و دو نہیں کرنی پڑے گی۔ یہ سہولت پی آئی اے کے نیٹ ورک کو ڈیجیٹل اور جدید خطوط پر استوار کرنے کی جانب ایک بڑا قدم ہے۔