اسلام آباد (نیوز ڈیسک ) سوشل میڈیا پر زیرِ گردش اطلاعات کے مطابق فیڈرل بورڈ آف ریونیو (ایف بی آر) نے ایک معروف پاکستانی شوبز شخصیت کے ممکنہ ٹیکس معاملات کی جانچ شروع کر دی ہے، جن پر مبینہ طور پر ٹیکس گوشواروں میں آمدن کم ظاہر کرنے کا شبہ ہے۔غیر مصدقہ رپورٹس کے مطابق مذکورہ اداکارہ کے سوشل میڈیا پلیٹ فارمز پر فالوورز کی تعداد تقریباً ایک کروڑ کے قریب ہے اور انہوں نے گزشتہ برس کے آغاز میں شادی کی تھی۔ خبروں میں دعویٰ کیا جا رہا ہے کہ اس شادی پر خطیر رقم خرچ کی گئی۔

ذرائع کے مطابق ابتدائی جائزے میں یہ بات سامنے آئی ہے کہ لاہور سے تعلق رکھنے والی فلم اور ٹی وی کی معروف اداکارہ نے اپنی شادی کی تقریبات پر مبینہ طور پر 6 کروڑ روپے سے زائد اخراجات کیے۔ ایف بی آر کی توجہ اس وقت مبذول ہوئی جب اداکارہ کی ظاہر کردہ آمدن اور ان کے طرزِ زندگی میں واضح فرق دیکھا گیا۔رپورٹس میں بتایا گیا ہے کہ اداکارہ نے تقریباً 9 برس قبل ایف بی آر میں بطور ٹیکس دہندہ رجسٹریشن کروائی تھی، تاہم ان کے جمع کرائے گئے ٹیکس گوشواروں میں درج آمدن اس سطح کی نہیں دکھائی دیتی جس سے نہ صرف مہنگی شادی بلکہ بار بار بیرونِ ملک سفر اور مختلف تقریبات میں شرکت کے اخراجات پورے ہو سکیں۔تحقیقات کے دوران ایف بی آر نے سوشل میڈیا پر موجود ویڈیوز، تصاویر اور پوسٹس کا جائزہ لیا، جن کی بنیاد پر شادی کی تقریبات کے مقامات، کیٹرنگ، لباس، زیورات اور دیگر انتظامات پر آنے والے اخراجات کا تخمینہ تقریباً 6 کروڑ 77 لاکھ روپے لگایا گیا۔ذرائع کا کہنا ہے کہ یہ تمام اخراجات اداکارہ کے ٹیکس گوشواروں میں ظاہر نہیں کیے گئے، جس سے یہ شبہ پیدا ہوا ہے کہ یہ رقوم غیر ظاہر شدہ آمدن سے ادا کی گئیں۔ایف بی آر کے مطابق گزشتہ چند برسوں میں اداکارہ کے بڑھتے ہوئے اخراجات اور سرگرمیوں سے عندیہ ملتا ہے کہ ٹیکس واجبات سے بچنے کی کوشش کی جا رہی ہو سکتی ہے۔

اسی بنیاد پر سیکشن 111 کے تحت غیر واضح آمدن یا اثاثوں سے متعلق نوٹس جاری کرنے کی تجویز دی گئی ہے۔اگر اداکارہ شادی، سفری اخراجات اور دیگر سرگرمیوں کے مالی ذرائع کی تسلی بخش وضاحت فراہم نہ کر سکیں تو ان رقوم کو چھپی ہوئی آمدن قرار دے کر قابلِ ٹیکس آمدن میں شامل کیا جا سکتا ہے۔ مزید برآں، جان بوجھ کر ٹیکس چوری ثابت ہونے کی صورت میں سیکشن 192-اے کے تحت قانونی کارروائی پر بھی غور کیا جا سکتا ہے۔تاہم یہ بات قابلِ ذکر ہے کہ تاحال ایف بی آر کی جانب سے کسی اداکارہ کا نام باضابطہ طور پر سامنے نہیں آیا۔ البتہ گزشتہ برس کے آغاز میں شادی کرنے والی اداکاراؤں میں ماورا حسین کا نام بھی شامل ہے، جن کے سوشل میڈیا اکاؤنٹس پر انسٹاگرام پر تقریباً 99 لاکھ، یوٹیوب پر 31 ہزار، فیس بک پر 24 لاکھ اور ایکس پر 19 لاکھ فالوورز موجود ہیں۔