اسلام آ با د (نیوز ڈیسک) گجرات زون میں نجی بینک کے 6 ملازمین کو کھاتہ داروں کے لاکرز سے تقریباً 9 کروڑ روپے مالیت کے اصلی سونے کے زیورات کو نقلی زیورات سے تبدیل کرنے کے الزام میں گرفتار کر لیا گیا۔نجی اخبار کی رپورٹ کے مطابق وفاقی تحقیقاتی ایجنسی (ایف آئی اے) نے اس معاملے پر تین الگ مقدمات قائم کیے ہیں، جبکہ اس دھوکہ دہی میں شریک بتایا جانے والا سنار محسن اب تک گرفتار نہیں ہو سکا۔
ایف آئی اے حکام کے مطابق گرفتار شدگان میں سروسز انڈسٹریز برانچ کے آپریشن منیجر ابو بکر زاہد اور کیشیئر شعیب شریف، منگووال برانچ کے سابق منیجر خالد محمود اور کیشیئر سعادت علی بھٹی، جبکہ ٹانڈا برانچ کے آپریشن منیجر محتشم عابد اور کیشیئر محمد علی شامل ہیں۔مقدمات میں درج تفصیلات کے مطابق ٹانڈا برانچ سے 5 کروڑ 50 لاکھ روپے، سروسز انڈسٹریز برانچ سے 2 کروڑ روپے اور منگووال برانچ سے ڈیڑھ کروڑ روپے مالیت کے اصلی زیورات نقلی زیورات سے بدل دیے گئے۔ایف آئی اے زون گوجرانوالہ کے ڈائریکٹر محمد بن اشرف نے بتایا کہ تمام ملزمان والٹ/اسٹرونگ روم کے مشترکہ نگران اور چابی رکھنے والے تھے۔ ان کا مزید کہنا تھا کہ دیگر گولڈ لون کیسز کی بھی تحقیقات جاری ہیں جبکہ سنار محسن کی گرفتاری کے لیے چھاپے مارے جا رہے ہیں۔
