اسلام آباد (نیوز ڈیسک) عیدالاضحیٰ کی آمد سے قبل 40 من وزنی بیل ’جے ایف 17 تھنڈر‘ کے چرچے، 50 لاکھ روپے میں فروخت ،قربانی کے جانوروں کی خرید و فروخت میں تیزی آنے کے ساتھ ہی حیدر آباد کے علاقے لیاقت کالونی میں ایک بھاری بھرکم بیل عوام کی توجہ کا مرکز بن گیا ہے۔ اس بیل کو اس کے غیر معمولی وزن اور جسامت کے باعث ’جے ایف 17 تھنڈر‘ کا نام دیا گیا ہے۔

اس جانور کا وزن تقریباً 40 من بتایا گیا ہے۔بیل کے مالک شاہ رخ نے اس نایاب بیل کو فروخت کے لیے پیش کیا، اور حیران کن طور پر اس کی قیمت پچاس لاکھ روپے میں طے پا گئی۔ اس سودے کے بعد بیل کی رخصتی کو ایک یادگار موقع میں بدل دیا گیا، جس کے لیے ایک باقاعدہ تقریب منعقد کی گئی۔تقریب میں نہ صرف خریدار کی بھرپور مہمان نوازی کی گئی بلکہ آنے والے افراد کو پھولوں اور کرنسی نوٹوں کے ہار پہنائے گئے، جب کہ روایتی اجرک بھی بطور تحفہ پیش کی گئی۔ اس موقع پر ماحول ایک تہوار کی صورت اختیار کر گیا۔دوسری جانب فلکیاتی ماہرین کی پیش گوئی کے مطابق پاکستان میں عیدالاضحیٰ ممکنہ طور پر 7 جون 2025 کو منائی جائے گی۔ سپارکو کے مطابق ذوالحج کا چاند 27 مئی کی شام 8 بج کر 2 منٹ پر پیدا ہوگا، تاہم اس دن چاند کی عمر صرف 11 گھنٹے 34 منٹ ہونے کے باعث رؤیت کے امکانات کم ہیں۔ اسی بنیاد پر یکم ذوالحج 29 مئی کو ہونے کا امکان ظاہر کیا جا رہا ہے، جس کے مطابق قربانی کا تہوار 7 جون کو متوقع ہے۔