کراچی(این این آئی)کے الیکٹرک سمیت ملک بھر کے بجلی صارفین کے لیے بڑی خوشخبری، بجلی کے بنیادی ٹیرف میں کمی کا امکان ظاہر کیا گیا ہے۔ مختلف کیٹیگریز میں 78 پیسے سے لے کر 2 روپے 25 پیسے فی یونٹ تک کمی متوقع ہے۔

ذرائع کے مطابق مالی سال 26-2025 میں بجلی صارفین کو 140 ارب سے 400 ارب روپے تک کا ریلیف ملنے کا تخمینہ لگایا گیا ہے۔ سی پی پی اے (سنٹرل پاور پرچیزنگ ایجنسی)نے بجلی تقسیم کار کمپنیوں کی جانب سے نیپرا کو بنیادی ٹیرف میں کمی کی درخواست جمع کرا دی ہے۔نیپرا (نیشنل الیکٹرک پاور ریگولیٹری اتھارٹی) 15 مئی کو اس درخواست پر سماعت کرے گا، جس کے بعد حتمی فیصلہ کیا جائے گا۔درخواست کے مطابق آئندہ مالی سال کے لیے پاور پرچیز پرائس (PPP) کا تخمینہ 24.75 سے 26.22 روپے فی یونٹ لگایا گیا ہے، جب کہ رواں مالی سال میں یہ قیمت 27 روپے فی یونٹ ہے۔اگر نیپرا ٹیرف میں کمی کی منظوری دیتا ہے تو یہ فیصلہ ملک بھر کے صارفین کے لیے مہنگائی کے دور میں ایک بڑی سہولت ثابت ہو سکتا ہے۔