اسلام آباد(این این آئی)حکومت کی جانب سے کیپسٹی چارجز میں کمی سے ملک بھر کے لیے بجلی سستی ہونیکا امکان ہے۔ذرائع کے مطابق کراچی سمیت ملک بھر کے بجلی صارفین کیلئے سہ ماہی ایڈجسٹمنٹ میں بجلی کی قیمت میں کمی کی درخواست پر(آج)بدھ کونیپرامیں سماعت کی جائے گی۔بجلی کی تقسیم کار کمپنیوں نے رواں مالی سال کی دوسری سہ ماہی ایڈجسٹمنٹ کی مد میں بجلی صارفین کو 52ارب 12کروڑ روپے سے زائد کا ریلیف دینے کیلئے درخواست نیپرا میں دائر کر رکھی ہے، بجلی کی قیمت میں فی یونٹ کتنی کمی ہوگی، اس حوالے سے فیصلہ نیپرا نے کرنا ہے۔
بجلی کی تقسیم کار کمپنیوں کی جانب سے رواں مالی سال کی دوسری سہ ماہی ایڈجسٹمنٹ اکتوبر تا دسمبر 2024کی مد میں بجلی کی قیمتوں میں کمی کی درخواست نیپرا میں دی گئی ہے، ان کمپنیوں نے کیپیسٹی چارجز کی مد میں 50ارب 66کروڑ روپے جبکہ ٹرانسمیشن اینڈ ڈسٹری بیوشن نقصانات کی مد میں 2ارب 66کروڑ روپے کی کمی مانگی ہے، تاہم آپریشنز اینڈ مینٹیننس کی مد میں صارفین سے 2ارب 69کروڑ روپے وصول کرنے کی درخواست بھی کی گئی ہے۔
حکومتی پالیسی گائیڈ لائنز کے مطابق ملک بھر میں بجلی کا یکساں ٹیرف برقرار رکھنے کے لیے سہ ماہی ایڈجسٹمنٹ کا اطلاق کے الیکٹرک صارفین پر بھی ہوگا۔نیپرا درخواست پر سماعت کے بعد فیصلہ وفاقی حکومت کو بھجوائے گی اور وفاقی حکومت کی منظوری سے سہ ماہی ایڈجسٹمنٹ کی مد میں بجلی کی قیمتوں میں کمی کا نوٹی فکیشن جاری کیا جائے گا۔امکان ظاہر کیا جارہا ہے کہ رواں مالی سال کی دوسری سہ ماہی ایڈجسٹمنٹ کا اطلاق مارچ کے بلوں سے شروع ہوکر 3ماہ کیلئے ہوگا، تاہم اس حوالے سے فیصلہ نیپرا کرے گی۔
