اسلام آباد (این این آئی) سال 2024میں مہنگائی ساڑھے تین سال کی کم ترین سطح تک آگئی ہے۔تفصیلات کے مطابق اپسوس کنزیومر کانفیڈنس انڈیکس سروے نے اپنی چوتھی سہ ماہی رپورٹ جاری کرتے ہوئے بتایا ہے کہ پاکستان کی معیشت میں گزشتہ سال کے دوران قابل ذکر بہتری آئی ہے اور پاکستان سٹاک مارکیٹ میں بدستور تیزی کا رجحان ہے، سروے رپورٹ میں کہا گیا کہ چوتھی سہ ماہی کے سروے نتائج میں کئی اقتصادی ریکارڈز بھی قائم ہوئے اور پاکستان کی مزید اقتصادی بہتری کا امکان ہے۔

رپورٹ میں کہا گیا کہ پاکستان میں 2024ء میں مہنگائی ساڑھے 3 سال کی کم ترین سطح تک پہنچ گئی ہے ،ستمبر 2023ء کے بعد اقتصادی حالت مضبوط قرار دینے والے عوام کی تعداد میں 4گنا اضافہ ہوا ہے۔رپورٹ میں کہا گیا ہے کہ معیشت کے حوالے سے 19فیصد افراد اگلے 6ماہ میں بہتری کی توقع رکھتے ہیں، پاکستان نے پہلی بار ترکیہ کو عالمی صارف اعتماد کے انڈیکس میں پیچھے چھوڑا ہے۔سروے رپورٹ کے مطابق پاکستان میں ملازمت کے تحفظ پر اعتماد میں مسلسل استحکام دیکھنے کو مل رہا ہے پاکستانیوں کی گھریلو خریداری کی صلاحیت میں6 پوائنٹس کی بہتری آئی اور مقامی اقتصادی حالات پر پاکستانیوں کا اعتماد 20 فیصد بڑھا جبکہ عدم اعتماد میں نمایاں کمی ہوئی ہے۔