لاہور( این این آئی)ٹیوٹا نے گاڑیوں کی پروڈکشن عارضی طور پر بند کر نے کا اعلان کیا ہے ۔ٹیوٹا پاکستان کو پچھلے ایک سے دو ماہ سے مسلسل سپلائی چین اور کم انوینٹری مسائل کا سامنا ہے۔ حال ہی میں ٹیوٹا انڈس موٹر کمپنی لمیٹڈ جو پاکستان کی معروف آٹو موٹیو مینوفیکچرر ہے نے اعلان کیا ہے کہ وہ اپنی پیداوار کو 26 ستمبر سے 30 ستمبر 2024 تک عارضی طور پر معطل کر رہی ہے۔کمپنی کی جانب سے یہ فیصلہ سپلائی لائن میں جاری مشکلات اور ضروری خام مال اور اجزا ء کی کمی کے باعث کیا گیا ۔

پاکستان اسٹاک ایکسچینج کو دئیے گئے ایک بیان میں کمپنی نے کہا کہ خام مال اور اجزا ء کی کم انوینٹری کی سطح نے کمپنی کی پیداواری ضروریات کو پورا کرنے کی صلاحیت کو متاثر کیا ہے۔ کمپنی کو سپلائی چین میں خلل کا سامنا کرنا پڑا ہے، جس کے نتیجے میں گاڑیوں کی تیاری کے لیے ضروری پرزوں کی کمی ہو گئی ہے۔اس سے قبل، ٹویوٹا پاکستان نے دو پیداواری کٹوتیوں کا اعلان کیا تھا، جو 5 جولائی 2024 سے 22 جولائی 2024 اور 6 اگست 2024 سے 8 اگست 2024 تک جاری رہیں۔

پیداوار کی معطلی کا کمپنی کی پیداوار اور گاڑیوں کی ترسیل پر عارضی اثر پڑنے کا امکان ہے۔ تاہم انڈس موٹرز نے اپنے صارفین کو یقین دلایا ہے کہ وہ کسی بھی رکاوٹ کو کم سے کم کرنے اور جلد از جلد معمول کے آپریشنز دوبارہ شروع کرنے کے لیے پوری کوشش کر رہی ہے۔