لاہور( این این آئی)ہنڈائی نشاط نے دوسرے ممالک سے مصنوعات کی ترسیل کی لاگت بڑھنے کے پیش نظر گاڑیوں کی قیمتوں میں بڑے اضافے کا اعلان کر دیا ،کمپنی کے مطابق ایلانٹرا، سوناٹا، ٹوسان اور پورٹر کی قیمتوں میں اضافہ کیا گیا ہے۔

ایلانٹرا 2000 سی سی کی قیمت میں اڑھائی لاکھ روپے کا اضافہ کر دیا گیاہے جس کے بعد گاڑی کی نئی قیمت 71 لاکھ 80 ہزار روپے ہو گئی ہے جبکہ اس سے قبل یہ گاڑی 69 لاکھ 30 ہزار روپے میں فروخت کی جارہی تھی۔ٹوسان جی ایل ایس ایف ڈبلیو ڈی کی قیمت میں ڈیڑھ لاکھ روپے کا اضافہ کیا گیاہے جس کے بعد نئی قیمت 73 لاکھ 15 ہزار روپے مقرر کر دی گئی ہے جبکہ ٹوسان جی ایل ایس اے ڈبلیو ڈی پہلے80 لاکھ 30 ہزار روپے میں دستیاب تھی جس کی قیمت اڑھائی لاکھ روپے بڑھا کر 82 لاکھ 80 ہزار روپے مقرر کر دی گئی ہے ۔

ٹوسان الٹی میٹ اے ڈبلیو ڈی کی قیمت میں بھی اڑھائی لاکھ روپے اضافہ کیا گیاہے جس کے بعد گاڑی کی نئی قیمت 89 لاکھ 9 ہزار روپے ہو گئی ہے ۔کمپنی کے مطابق سوناٹا 2000 سی سی کی قیمت میں بھی اڑھائی لاکھ روپے اضافہ کیا گیاہے جس کے بعد گاڑی ایک کروڑ 2 لاکھ 29 ہزار روپے ہو گئی ہے جبکہ اس سے قبل یہ گاڑی 99لاکھ 79 ہزار روپے میں دستیاب تھی ۔سوناٹا 2500 سی سی کی پرانی قیمت ایک کروڑ 9 لاکھ 30 ہزا ر روپے سے بڑھا کر ایک کروڑ 12 لاکھ 5 ہزار روپے مقرر کر دی گئی ہے ۔