سکھر(این این آئی)موسم گرما کے آتے ہی جہاں دیگر اشیائے خورد و نوش کی قیمتیں آسمان تک جا پہنچتی ہیں وہیں اس بار لیموں کو بھی عوام کی پہنچ سے دور کردیاہے۔گرمیوں کا آسان اور سستا توڑ بھی مہنگا ہوگیا، لیموں کے دام بے لگام ہوگئے، لوگ گرمی میں ٹھنڈک پانے کیلئے لیموں پانی جیسی نعمت سے بھی محروم ہوتے جارہے ہیں۔

گزشتہ چند روز کے دوران لیموں کی قیمت میں ہوشربا اضافہ سامنے آیا ہے جس کے بعد مارکیٹ میں ایک کلو لیموں 500 کے بجائے ایک ہزار روپے فی کلو فروخت ہورہا ہے۔رپورٹ کے مطابق بے خبر اور نااہل انتظامیہ کی وجہ سے لیموں اور گوشت کی قیمت برابر ہوگئی، لیکن متعلقہ حکام کے کانوں پر جوں تک نہیں رینگ رہی۔شہریوں نے بتایاکہ گرمی کی شدت کی وجہ سے لیموں پانی کا استعمال بڑھ گیا ہے جبکہ انتظامیہ لیموں کی قیمتیں کنٹرول کرنے میں ناکام نظر آرہی ہے۔