اسلام آباد (این این آئی)نگران وفاقی حکومت نے بجلی کی قیمت کم کرنے کا فیصلہ کرتے ہوئے ونڈ پاور پلانٹس سے ٹیرف کم کروانے کیلئے 5 رکنی کمیٹی قائم کر دی ہے۔ نجی ٹی وی کے مطابق نگران وفاقی حکومت نے بجلی کی قیمت کم کرنے کا فیصلہ کرتے ہوئے 14ونڈ پاور پلانٹس کو 20ارب روپے کی ادائیگیاں روک دی ہیں، تحقیقات میں ونڈ پاور پلانٹس کی اضافی لاگت پکڑی گئی تھی مگر عملدر آمد نہیں ہوا تھا ۔
اس حوالے سے پرائیویٹ پاور اینڈ انفرااسٹرکچر بورڈ کے منیجنگ ڈائریکٹر کی سربراہی میں 5رکنی کمیٹی قائم کر کے سمری بھیج دی گئی ہے۔ سمری کے مطابق کمیٹی کو شوگر ملز کے پاور پلانٹس کا ٹیرف کم کروانے کا ٹاسک بھی سونپا گیا ہے جس میں کہا گیا ہے کہ پاور پلانٹس پہلے ٹیرف کم کرکے نیا معاہدہ کریں پھر ادائیگیاں ہوں گی۔ذرائع کے مطابق کمیٹی نیلم جہلم پن بجلی منصوبے کے باعث مظفر آباد کو در پیش پانی کی قلت پر بھی غور کرے گی۔دوسری جانب کابینہ کمیٹی برائے توانائی کا اجلاس 26 جنوری کو طلب کر لیا گیا۔
