پشاور(این این آئی)پشاورسمیت صوبہ بھر میں بجلی کی غیراعلانیہ لوڈشیڈنگ نے لوگوں کی زندگی اجیرن کردی۔ عید پر بھی 12 تا 16 گھنٹے بجلی بندش کاسلسلہ جاری رہا، پیسکو حکام کے واضح احکامات کے باوجود صوبائی دارالحکومت پشاور میں عید کے دن سے بجلی کی لوڈ شیڈنگ کا سلسلہ بدستور جاری رہا جس کے خلاف عوام نے احتجاج بھی کیا ہے۔پیسکو حکام نے صوبے بھر میں عید پر لوڈ شیڈنگ نہ کرنے کا اعلان کر رکھا تھا تاہم اس واضح اعلان کے باوجود لوڈ شیڈنگ کا سلسلہ تھم نہ سکا، پشاور کے شہری علاقوں میں اس وقت لوڈ شیڈنگ کا دورانیہ 6 سے 8 گھنٹے جبکہ نواحی علاقوں میں لوڈ شیڈنگ کا دورانیہ 12 سے 16 گھنٹے تک ہے۔

پیسکو حکام کے مطابق اس وقت صوبے کے لیے 3600 میگا واٹ بجلی کی ضرورت ہے جبکہ موجودہ حالات میں صوبے کو صرف 1800 میگا واٹ بجلی سپلائی کی جا رہی ہے جس کی وجہ سے لوڈ شیڈنگ پر قابو نہیں پایا جاسکتا۔دوسری جانب بجلی کی لوڈشیڈنگ کے خلاف چارسدہ روڈ کے عوام نے شدید احتجاج کیا اور نعرے بازی کی۔ احتجاج میں بڑی تعداد میں شہریوں کی شرکت اور سڑک کو ہر قسم کے ٹریفک کے لیے بند کر دیا۔مظاہرین کا کہنا تھا کہ پیسکو والوں نے شدید گرمی میں ہمیں جلا کر رکھ دیا، سولہ سولہ گھنٹے بجلی نہیں ہے، لوڈ شیڈنگ نے زندگی مشکل بنا دی، علاقے میں پینے کا پانی تک نہیں، عید پر بھی بجلی کی شدید لوڈشیڈنگ کی جارہی ہے۔صوبے کے دیگر اضلاع مردان ،صوابی ،ملاکنڈڈویژن سمیت کئی علاقوں میں بجلی لوڈشیڈنگ نے عوام کوشدید مشکلات میں مبتلا کردیا ہے۔