اسلام آباد (این این آئی)انٹرنیشنل مانیٹری فنڈ نے ایک بار پھر پاکستان پر شرح سود میں اضافے پر زور دیتے ہوئے معاشی شرح نمو اور مہنگائی کی شرح سے متعلق تخمینے جاری کردیئے ہیں۔تفصیلات کے مطابق انٹرنیشنل مانیٹری فنڈ(آئی ایم ایف) نے مڈل ایسٹ اور سینٹرل ایشیا کی علاقائی آؤٹ لک رپورٹ جاری کردی ہے جس میں پاکستان کی موجودہ مالی سال کی معاشی شرح نمو 0.5فیصد اور مہنگائی کی اوسط شرح 27فیصد رہنے کا امکان ظاہر کیا گیا ہے۔

رپورٹ میں اگلے مالی سال معاشی ترقی کی رفتار بڑھ کر 3.5فیصد تک جانے کی پیش گوئی کی گئی ہے جبکہ بتایا گیا ہے کہ گزشتہ مالی سال معاشی شرح نمو 6 فیصد تھی۔آئی ایم ایف نے پاکستان میں شرح سود مزید بڑھانے پر زور دیتے ہوئے کہا ہے کہ مہنگائی پر قابو پانے کیلئے پالیسی ریٹ مزید بڑھانے کی ضرورت ہے۔آئی ایم ایف نے رپورٹ میں کہا ہے کہ پاکستان، مصر اور تیونس میں مہنگائی میں اضافہ جاری ہے، مہنگائی کے زیادہ دبا ؤوالے ملکوں میں سخت مانیٹری پالیسی اختیار کرنا ہوگی۔

رپورٹ میں بتایا گیاہے کہ اگلے مالی سال اشیا اور خدمات کا تجارتی خسارہ 37.4ارب ڈالر رہنے کا امکان ہے جبکہ اشیا اور خدمات کی برآمد کا تخمینہ 40ارب ڈالر ہے، اس دوران درآمدات کا حجم 77ارب ڈالر سے تجاوز کرسکتا ہے۔رپورٹ کے مطابق اگلے سال پاکستان کے زرمبادلہ ذخائر 11.7ارب ڈالر رہنے کا امکان ہے جبکہ اس سال بجٹ خسارہ 6.8فیصد اور اگلے سال 8.3فیصد تک جانے کا تخمینہ لگایا گیا ہے۔آئی ایم ایف نے اپنی رپورٹ میں اس سال کرنٹ اکاؤنٹ خسارہ 2.3فیصد اور اگلے سال 2.4فیصد رہنے کا امکان ظاہر کیا ہے۔