اسلام آباد (این این آئی)کے الیکٹرک کے 900 میگاواٹ کے نئے پاور پلانٹ کو 150 ملین مکعب فٹ آر ایل این جی کی فراہمی معاملے پر پٹرولیم ڈویژن نے کے الیکٹرک کیلئے درآمدی گیس کا ٹیرف مقرر کرنے کا اختیار اوگرا کو دینے کی سفارش کر دی۔ پٹرولیم ڈویژن نے کے

الیکٹرک کو آر ایل این جی فروخت معائدے کیلئے سرکاری کمپنی پاکستان ایل این جی لیمٹیڈ کو گیس فراہم کرنے والی کمپنی کا درجہ دینے کی سفارش کی،حکومت کی طرف سے پی ایل ایل کو گیس سپلائی کمپنی کا درجہ دینے کے بعد ہی اوگرا آر ایل این جی کا ٹیرف مقرر کر سکتا ہے ،حکومت نے 2016 میں سوئی نادرن اور سوئی سدرن کو آر ایل این جی فروخت کرنے والی کمپنیوں کا درجہ دیا تھا،وزارت خزانہ ، وزارت قانون اور منصوبہ بندی کمیشن نے ترمیم کی حمایت کی ہے ۔ تجویز دی گئی کہ کے الیکٹرک ساتھ معاہدے میں ایل این جی کے عدم استعمال پر جرمانہ کی شق رکھی جائے ، کے الیکٹرک کا 900 میگاواٹ کا پلانٹ مکمل ہو چکا ۔پٹرولیم ڈویژن کے مطابق پلانٹ کو چلانے کیلئے آر ایل این جی کی فراہمی کا انتظار ہے ،ای سی سی کی منظوری کی صورت میں کے الیکٹرک اور پی ایل ایل کے درمیان معاہدے پر عملدرآمد شروع کیا جائے گا ۔