لاہور(مانیٹرنگ ڈیسک )صوبائی دارالحکومت میں مرغی کا گوشت، انڈے اور سبزیوں کی قیمتوں میں روز بروز اضافے نے شہریوں کو پریشان کر دیا ہے ۔شہر میں میں مرغی کے گوشت نے ٹرپل سنچری جبکہ زندہ مرغی نے اپنی ڈبل سنچری مکمل کر لی ہے ، ادھر فارمی انڈے مسلسل پندرہویں روز بھی
166 روپے فی درجن پر دستیاب ہیں۔قومی موقرنامے کے مطابق چکن اور انڈوں کی سرکاری ریٹ لسٹ کے مطابق شہر میں زندہ برائلر مرغی نے اپنی ڈبل سنچری مکمل کر لی ہے ، 8 روپے اضافے کے بعد تھوک میں 211 روپے کلو جبکہ پرچون میں 5 روپے اضافے کے بعد 206 روپے فی کلو پر دستیاب ہے ، اسی طرح برائلر کے ہلال گوشت نے اپنی ٹرپل سنچری مکمل کر لی ہے ۔برائلر گوشت 7 روپے اضافے کے بعد 306 روپے کلو ہو گیا ہے ، دوسری جانب شہر میں فارمی انڈے مسلسل پندرہویں روز 166 روپے فی درجن پر مستحکم ہیں۔دوسری جانب شہر میں متعدد پھلوں اور سبزیوں کی سرکاری قیمتوں میں اضافہ دیکھنے میں آیاہے ۔ اوپن مارکیٹ میں ادرک کی 600 روپے کلو سے زائد میں فروخت جاری ہے ، انگور، لہسن، شملہ مرچ نے ٹرپل سنچری، پپیتا، ناریل، سبز مرچ، مٹر نے ڈبل سنچری جبکہ سیب، آلو، پیاز، اروی، دیسی ٹینڈے ، مونگرے نے بھی سنچری مکمل کر لی ہے ۔اوپن مارکیٹ کے تاجروں کا کہنا ہے کہ منڈی سے اشیا مہنگی ملتی ہیں عوام کو سستی کہاں سے فروخت کریں۔
