لاہور( آن لائن )پاک سوزوکی نے پاکستان میں پہلی مرتبہ 660 سی سی انجن سے لیس مقامی طور پر تیار ہونے والی گاڑی آلٹو کی فروخت کی تاریخ کا اعلان کر دیا ہے۔ تفصیلات کے مطابق پاک سوزوکی نے 660 سی سی انجن سے لیس گاڑی آلٹو کو رواں سال اپریل میں متعارف کروایا تھا۔ تاہم اب پاک سوزوکی نے اس گاڑی کی فروخت کی تاریخ کا اعلان کیا ہے۔
اس گاڑی کو سب سے پہلے کراچی میں ہونے والے پاکستان آٹو شو کے دوران پیش کیا گیا تھا۔ پاک سوزوکی کے آفیشل فیس بک پیج میں ایک پوسٹ میں بتایا گیا کہ آلٹو 660 سی سی کو 15 سے 16جون تک فروخت کے لیے پیش کیا جائے گا جس کا عنیہ کانٹ ڈان میٹر سے ملتا ہے مگر اس میں کسی تاریخ کا ذکر نہیں ہے۔ آلٹو 660 سی سی کو 3 مختلف ورژن میں پیش کیا جائے گا یعنی آلٹو وی ایک(اے سی کے بغیر)، آلٹو وی ایکس آر (اے سی کے ساتھ)اور آلٹو وی ایکس ایل اے جی ایس (اے سی اور آٹو میٹک ٹرانسمیشن کے ساتھ)۔کمپنی کی جانب سے اس گاڑی کی قیمت کا اعلان تو نہیں کیا لیکن مارکیٹ ڈیلرز کے خیال میں اس کی قیمت 10 لاکھ 50 ہزار روپے سے 11 لاکھ 75 ہزار روپے تک ہوسکتی ہے۔ اس گاڑی کی بکنگ کمپنی کی جانب سے اپریل میں 5 لاکھ روپے میں کی جارہی تھی۔ خیال رہے کہ اس نئی گاڑی کو سوزوکی مہران کے متبادل کے طور پر پیش کیا جارہا ہے۔ پاک سوزوکی نے دعویٰ کیا کہ یہ ایندھن میں بچت دینے کے ساتھ ماڈرن ڈیزائن والی گاڑی ہے جس کے ساتھ کمپنی 3 سالہ وارنٹی دے گی۔ یاد رہے کہ اکتوبر 2016 میں پاک سوزوکی نے 2018 تک اپنی لوکل پروڈکشن کے آغاز کا اعلان کیا تھا جس کے تحت کہا گیا تھا کہ سوزوکی کی 800 سی سی مہران گاڑی کو 660 سی سی آلٹو گاڑی سے تبدیل کر دیا جائے گا۔
