کراچی(این این آئی) پاکستان کے اہم صنعتی شو ’’ پاکستان آٹو پارٹس شو‘‘ کا انعقاد کراچی ایکسپو سینٹر میں (آج) 12 اپریل سے ہوگا یہ نمائش 14 اپریل تک ھاری رہے گی،یہ جنوبی ایشیا کی سب سے بڑی آٹو صنعت کی نمائش ہوگی۔پاکستان ایسوسی ایشن آف آٹو پارٹس اینڈ ایکسریز
مینوفیکچررز (پاپام) پیپس شو 2019 کا انعقاد کررہا ہے جس میں بڑی تعداد میں ملکی اور غیر ملکی کمپنیاں اور نمائندے اپنی مصنوعات اجاگر کریں گے۔اس میں 244 کمپنیاں، اور پاکستان میں سرمایہ کاری کرنے والی نئی کمپنیاں خصوصی طور پر KIAاور چینگن اپنی گاڑیوں کی نمائش کریں گی۔ اس موقع پر دیگر پاکستانی کار ساز ادارے بھی اپنی گاڑیوں اور ٹیکنالوجی کو نمایاں کریں گے۔شو میں صنعت اور دیگر تمام شعبوں کی نمائندگی ہوگی جن میں آلات اور مشینری بنانے والی کمپنیاں، کار ساز ادارے، خام مال فراہم کرنے والے سپلائرز، سروس پروائڈرز، جامعات،کے علاوہ کاسٹنگ، فورجنگ، پلاسٹک اور ربڑ، شیٹ میٹل، فکسچرز اور الیکٹرونکس وغیرہ بھی شامل ہیں۔نمائش میں تمام اقسام کی چھوٹی بڑی گاڑیاں بشمول کاریں، بسیں، ٹریکٹرز، رکشا، موٹر سائیکلیں، بڑی بسیں، فور بائی فور اور دیگر کمرشل گاڑیاں شامل ہوں گی۔ شو میں پاپام کے چیئرمین محمد اشرف شیخ، اور پیپس شو 2019 کے چیئرمین مشہود علی خان دیگر اہم افراد کے ساتھ نمائش کے اغراض و مقاصد بھی بتائیں گے۔
